Asturies sitúase per enriba de la media española en capital humanu, dedicáu a la investigación y la innovación, especialmente nel empléu nel sector d’alta tecnoloxía, na formación en educación superior y na calidá de les publicaciones. Esti ye uno de los datos que revela l’últimu informe de la Cátedra de la Innovación (C_InnovA), presentao esta mañana, y que tamién pon de relieve que la comunidá precisa incrementar la inversión del sector priváu en I+D+i pa subir posiciones ya igualase con Europa.
El documentu La I+D+i en Asturias: una primera aproximación a la situación de la región en el contexto nacional y europeo analiza les fortaleces y debilidaes col restu d’autonomíes. Na presentación participaron el conseyeru de Ciencia, Innovación y Universidá, Borja Sánchez; la vicerrectora de Tresferencia y Rellaciones cola empresa de la Universidá d’Uviéu, Susana Menéndez, y el director de la cátedra Fernando Rubiera, que detallaron les principales conclusiones.
En cuanto al potencial p’adelantar posiciones nel ámbitu de la investigación, el desenvolvimientu tecnolóxicu y la innovación, el analís d’indicadores revela que’l Principáu s’alcuentra ente’l 25% de les rexones meyor posicionaes en capital humanu. Amás, destaca sobre manera, na cuarta posición, nel porcentaxe de trabayadores en sectores d’alta tecnoloxía, con un 3,5% de población empleada nesti ámbitu.
Nes debilidaes, l’informa destaca’l datu yá conocíu de la inversión d’Asturies en I+D+i, un 0,82% de su PIB, ya identifica la mayor brecha nel sector priváu, con un valor un 34% inferior a la media nacional.
