Asturies foi en 2021 la segunda comunidá autónoma con mayor númberu de tresplantes realizaos por millón d’habitantes (128,7), namá por detrás de Cantabria (141,4). La media estatal ta en 100,9.
L’andanciu condicionó esti tipu d’actividá en tol mundu por cuenta de les sobrecargues asistenciales de les unidaes de cuidos intensivos. Sicasí, nel Principáu caltuvieron tolos programes de donación y tresplantes activos.
Los equipos del Hospital Universitariu Central d’Asturies (HUCA), centru de referencia rexonal pa esti tipu d’intervenciones, realizaron l’añu pasáu 15 tresplantes cardiacos, 76 renales y 30 de fégadu (11 más que l’exerciciu anterior). Amás, practicáronse 42 tresplantes autólogos de migollu –con célules de la mesma persona- y otros 35 alogénicos –con célules d’otres persones, 18 de les cualos nun teníen relación de parentescu col receptor-. Amás, ensertáronse 131 córnees.
Per otra parte, siete persones d’Asturies recibieron un pulmón nel Hospital Universitariu Marqués de Valdecilla, de Cantabria.
Donaciones
El númberu de donantes aumentó respectu al primer añu de la crisis sanitaria, hasta algamar la tasa rexonal los 51,5 por millón de población (pmp), frente a los 45,5 de 2020. Estos datos asitien a Asturies como la cuarta comunidá en númberu de donantes, precedida per Cantabria (72,4), Navarra (62,1) y Murcia (52,3). La media nacional ye de 40,2.
Per segundu añu consecutivu, el HUCA rexistró’l mayor númberu de donantes en muerte encefálica del país, con 44,6 por millón de población, casi’l doble de la media nacional, de 26,2.
Asturies ye la tercer autonomía con mayor porcentaxe de donantes multiórganicos (81%), por detrás de la Comunidat Valenciana (87%) y Galiza (83%).
Perfil del donante
Asturies ye’l territoriu con menos negatives familiares a la donación, concretamente un 5%, frente al 17% de media nacional. L’añu pasáu contabilizáronse 91 donaciones, de les que 52 fueron multiorgánicas, esto ye, de persones que donaron tolos sos órganos, ente que 39 dexaron les córnees.
La edá media de los donantes asitiase en 57 años. El 42% yeren muyeres y el 58%, homes.
La coordinadora autonómica y hospitalaria de tresplantes, Dolores Escuderu, sorrayó la importancia de la donación d’órganos, yá que cada donante regala un promediu de 30 años de vida. Amás, dellos estudios demuestren qu’un donante de seis órganos (multiorgánico) puede ufiertar hasta 55,4 años a los distintos receptores.
Por cuenta de la celebración del Día Nacional del Tresplante, el Gobiernu d’Asturies reconoz el trabayu de los equipos del Serviciu de Salú (Sespa) y estima l’arrogancia y solidaridá de tolos donantes y de les families que faen posible esti tipu d’intervenciones.
