Los profesionales de la rede pública de residencies d’Asturies (ERA) recibieron esta selmana 8.000 mázcares pa reforzar los cuidaos frente al coronavirus. Una dotación nueva de material que yá se tán apurriendo a tolos equipos pa protexer tanto la so salú como la de les persones mayores. “La situación pue camudar nos díes vinientes, unviáronse instrucciones pa que l’usu de los sistemes de protección seya afayadizu pal contestu que vivimos. En collaboración col Sespa, y tamién de manera unillateral, ta dotándose d’esos sistemes de protección según la clasificación y condiciones d’usu correspondientes”, esplica la xerente del ERA, Ana María Suárez.
Amás de les mázcares, entregáronse dispositivos móviles nos centros de la rede pública cola mira de que les families puedan comunicase colos residentes al traviés de videoconferencies o videollamaes. La xerente del ERA asegura que’l contactu al traviés d’estes canales va valir pa “alliviar a les families”, principalmente ellí onde se rexistren más casos positivos, como la residencia de Grau o el centru Palacio de El Villar, en Castrillón.
Les mázcares destinaes a los profesionales de la rede pública foron dispensaes pol ERA. D’equí p’arriba, espérase que’l repartu de material se lleve a cabu de forma sistemática. Pela so parte, los centros privaos reciben el material correspondiente al traviés de la Conseyería de Salú, como determinen les órdenes ministeriales.
