El Conseyu de Gobiernu reforzó los recursos contra la violencia machista Per un sitiu, l’Executivu aprobó la celebración de los convenios de collaboración ente l’Alministración autonómica y los conceyos de Xixón, Uviéu, Avilés, Llangréu, Valdés y Castrillón pal caltenimientu de la rede de cases d’acoyida pa les víctimes de violencia de xéneru y a los sos fíos y fíes.
Por aciu estos alcuerdos, Uviéu, Xixón y Avilés apurren fondos por valor de 255.000 euros, amás de dos cases y un pisu tuteláu, ente que Llangréu, Valdés y Castrillón dexen l’usu d’otros trés inmuebles. El Conceyu de Corvera, pela so parte, dexó l’usu de dos viviendes pa la so incorporación a la rede na modalidá de pisos tutelaos.
Asturies destina anguaño 1.102.143 euros al caltenimientu de los dispositivos d’atención y acoyida a víctimes de violencia de xéneru al traviés d’una subvención a Cruz Roja Española n’Asturies pa la xestión añal de la Rede de Cases d’Acoyida, que cunta colos siguientes dispositivos: un serviciu d’atención a ingresos y emerxencies, les cases d’acoyida d’Avilés y Uviéu, el Centru d’Atención Integral a Muyeres Víctimes de Violencia de Xéneru de Xixón/Xixón (Casa Malva) y 22 pisos tutelaos: doce en Xixón, cuatro n’Uviéu, dos en Corvera y unu n’Avilés, otru en Castrillón, unu más en Llangréu y otru en Valdés
• Per otru, el gobiernu dio lluz verde a un gastu de 1.026.000 euros pa la convocatoria pública d’ayudes a muyeres víctimes de violencia de xéneru y a fíes y fíos de víctimes mortales pola mesma causa nesti exerciciu. Esta convocatoria va tener dos llinies d’actuación:
o Muyeres víctimes de violencia de xéneru que nun convivan cola pareya maltratadora y precisen de sofitu económicu pa empecipiar el procesu de recuperación y una vida autónoma: 996.000 euros.
o Fíes y fíos de víctimes mortales por violencia de xéneru: 30.000 euros.
En dambos casos, l’ayuda va ser de 3.000 euros nun únicu pagu añal. Una vegada publicada la convocatoria nel BOPA, va abrise un plazu de venti díes hábiles pa la presentación de solicitúes.
