Villaviciosa garra’l relevu de la Xira pola Oficialidá

La Xira pola Oficialidá fai parada en Villaviciosa. Dempués de los actos organizaos nos conceyos de Bimenes y Samartín del Rei Aurelio, la campaña d’Iniciativa pol Asturianu y la Fundación Almastur aporta al conceyu maliayu. El programa d’actividaes va a entamar el llunes 6 de payares a les 19 hores cola inauguración institucional na Casa de los Hevia de la esposición sobre la hestoria de la llingua asturiana y la charra-coloquiu ‘¿Por qué sí a la oficialidá del asturianu?’ que va correr a cargu d’Inaciu Galán, vocal d’Iniciativa pol Asturianu y miembru de l’Academia de la Llingua Asturiana.

Les actividaes van siguir el martes 7 a les 19 hores cola proyección documental ‘De güeles a nietes. El retu de la tresmisión xeneracional del asturianu’ y posterior alderique sobre la dificutá de la tresmisión xeneracional. El miércoles 8 de payares a les 19 hores, el filólogu y profesor de la Universidá d’Uviéu Ramón d’Andrés falará sobre la toponimia n’asturianu del conceyu de Villaviciosa.

El xueves 9 a les 19 hores va tener llugar charra-coloquiu ‘Escritores de Maliayo. 4 sieglos escribiendo n’asturianu’ por Miguel González Pereda, cronista oficial del conceyu y presidente del Atenéu Obreru de Villaviciosa. Les actividaes finarán el vienres 20 cola clausura de la Xira con una apertura musical con gaita asturiana y homenaxe a los y les escritores de Villaviciosa na Casa de Caveda y Nava, un recital poéticu y llectura del manifiestu pola oficialidá y el pieslle musical con Mariluz Cristóbal Caunedo.

Tolos actos y esposiciones van celebrase na Casa de los Hevia. La Fundación Almastur y Iniciativa pol Asturianu animen a los centros educativos, asociaciones culturales, movimientu vecinal y entidaes xuveniles del conceyu a participar nel programa de la Xira pola Oficialidá. Dambes entidaes quieren treslladar el so agradecimientu al Conceyu de Villaviciosa, n’especial pol alcalde, Alejandro Vega, y pola conceyala de Cultura, Rocío Vega, pol sofitu y collaboración p’acoyer la Xira pola Oficialidá.