El Gobiernu d’Asturies va invertir 3,1 millones na so Estratexa de Conectividad Aérea pa promocionar Asturies nos vuelos directos a Sevilla, Málaga, Alicante, Valencia y Mallorca. A partir de la primavera de 2026, Asturies va cuntar con enllaces diarios mientres tol añu a estos cinco destinos, que van algamar les 9 salíes selmanales ente abril y payares. En total, Asturies asegura un mínimu de 2.750.000 places.
La Sociedá Pública de Xestión y Promoción Turística y Cultural del Principáu resolvió’l concursu de promoción al traviés de les conexones aérees. Volotea foi l’axudicataria de los llotes correspondientes a Sevilla, Málaga, Alicante y Valencia y Vueling del de Mallorca.
“Asturies ye un destín multiaccesible, l’únicu de la fachada cantábrica que cunta con alta velocidá ferroviaria, amás d’aeropuertu. Ésa ye una ventaya competitiva que tenemos d’aprovechar pa llograr el nuesu oxetivu de desestacionalizar les visites y aumentar la nuesa visibilidá en mercaos nacionales que pueden ser nichu pal turismu MICE”, destacó’l viceconseyeru d’Infraestructures y Movilidá, Jorge García. MICE ye un acrónimu correspondiente a les pallabres ingleses meetings, incentives, conferences y exhibitions. Na xíriga turística utilízase pa referise al turismu rellacionáu con congresos y actividaes profesionales.
La operativa mínima que se va desenvolver hasta finales de 2028 con estes cinco ciudaes va dexar asegurar siquier 15.676 vuelos con orixe o destín nel Aeropuertu d’Asturies. Nel casu de Sevilla, Málaga, Alicante y Valencia va haber un mínimu de 9 salíes selmanales mientres les temporaes branices dende 2026. En Mallorca esta cifra va algamar mientres los meses centrales del branu yá dende 2025.
