El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, valoró güei como una noticia de gran relevancia la declaración de la mina de La Camocha como Llugar de Memoria Democrática, una distinción que foi publicada nel Boletín Oficial del Estáu.
Zapico recordó que’l Gobiernu d’Asturies venía defendiendo esta iniciativa dende va años y señaló que la propuesta foi treslladada al Gobiernu central mientres una xunta billateral celebrada en Madrid na que participaron responsables de la conseyería y del área de Memoria Democrática.
El conseyeru esplicó que l’Executivu autonómicu consideró entós que La Camocha axuntaba dafechu los requisitos pa recibir esta declaración pol so significáu históricu na defensa de la democracia, les llibertaes y los derechos de la clase trabayadora asturiana.
Coles mesmes, destacó’l papel desempeñáu por esti enclave na nacencia del sindicatu Comisiones Obreres y la so relevancia pa entender tanto la llucha contra la dictadura como l’afitamientu de la democracia mientres les últimes décades.
Zapico señaló que la publicación d’esta declaración nel BOE supón rematar una aspiración largamente defendida dende Asturies y afirmó que la reconocencia oficial del Gobiernu d’España asitia a La Camocha nel llugar que-y correspuende dientro de la memoria democrática del país.
