La poeta Xosefa de Xovellanos va poner nome al nuevu colexu d’educación Infantil y Primaria (CEIP) que’l Gobiernu d’Asturies constrúi nel barriu xixonés de Nuevu Roces. L’Executivu autonómicu acaba d’aprobar la creación alministrativa d’esti centru que, finalmente, va inaugurase en septiembre con tolos cursos de dambes etapes.
L’equipamientu supón la mayor inversión del gobiernu nun centru públicu d’Infantil y Primaria, con un presupuestu de 16,5 millones. A esa cifra hai que sumar los más de 140.000 euros del moblame previstu pa cubrir les necesidaes del cursu inaugural.
El colexu va empezar la so andadura con once unidaes: cuatro d’Infantil y nueve de Primaria. Va haber dos unidaes nel primer cursu de cada etapa (Infantil de 3 años y 1.u de Primaria), mientres que’l restu de niveles va disponer d’una unidá.
Con esa distribución prevése dar respuesta a les 203 solicitúes rexistraes mientres el periodu d’almisión pal cursu 2026-2027. De cara al futuru, el colexu ta habilitáu p’allugar hasta 27 unidaes: 9 d’Infantil y 18 de Primaria.
L’alumnáu va tar adscritu al Institutu de Secundaria de Roces, mientres que la unidá de Secretaría asignóse al Colexu Nicanor Piñole, del barriu de Contrueces. Nesti centru yá se realizó’l periodu d’almisión y tamién se va formalizar, en xunu, la matriculación.
