El Parque Hermanos Castro de Xixón va acoyer, del 28 d’agostu al 4 d’ochobre, un gran parque hinchable de 4.000 metros cuadraos empobináu especialmente al públicu familiar y con propuestes pa visitantes de toles edaes.
La instalación va axuntar 10 árees de xuegu diferentes, conectaes al traviés de distintes zones de saltu y diseñaes pa combinar actividá física, xuegos y retos. La propuesta busca convertir mientres delles selmanes una parte del parque xixonés nun espaciu dedicáu al ociu familiar.
Ente les atracciones previstes atópense diferentes toboganes, llaberintos y circuitos de torgues, amás d’espacios de saltu y pruebes d’habilidá. El recintu va cuntar tamién con propuestes como’l Desafíu Montañosu, la Carrera de Torgues, Gumball Gallop o Ninja Wall, xunto a un tobogán d’hasta siete metros d’altor.
La instalación va tar acompañada per zones verdes y árees de descansu, amás d’una ambientación temática pensada pa completar la esperiencia. L’oxetivu ye que tanto los más pequeños como los adultos puedan participar nes distintes actividaes, con una ufierta que combina xuegos de movimientu, aventura y entretenimientu.
El proyectu, orixinariu de California, llega per primer vegada a Europa y va instalase en Xixón mientres daqué más d’un mes. L’apertura del parque ta prevista pal 28 d’agostu, y va permanecer nel Parque Hermanos Castro hasta’l 4 d’ochobre.