El Gobiernu asturianu va destinar 1,1 millones a la concesión d’ayudes a proyectos de acuicultura y a la modernización y restructuración del sector pesqueru nel periodu 2020-21. Estes subvenciones, con una gran demanda nel sector, tán cofinanciaes pol Fondu Européu Marítimu y de la Pesca (FEMP) nun 75% y la so cuantía ye del 50% del costu de cada iniciativa.
La so finalidá ye’l fomentu, meyora, sostenibilidá y modernización de proyectos de acuicultura, y favorecer actuaciones nel ámbitu de la tresformación y comercialización que promuevan la competitividá de les empreses pesqueres y acuícoles, amás de fomentar el desenvolvimientu sostenible y respetuosu col mediu ambiente. Estes subvenciones permitieron financiar l’añu pasáu once actuaciones de diez empreses por importe de 860.000 euros.
Les llinies d’ayuda
La llinia de sofitu a la acuicultura, dotada con 400.000 euros, subvenciona proyectos de diversificación de la producción y del tipu d’especies cultivaes; de recuperación d’estanques y llagunes; de modernización de los centros, y de meyora de la salú y bienestar de los animales. Tamién sofita inversiones qu’amenorguen l’impactu negativu nel medioambiente y favorezan l’usu y calidá de l’agua, aumentando’l caudal de salida o amenorgando’l consumu por aciu sistemes de recirculación de circuitu zarráu.
A lo último, impulsa la creación de nueves empreses acuícoles sostenibles y de proyectos qu’aumenten la eficiencia enerxética, l’usu d’enerxíes anovables nes instalaciones o la xeneración d’enerxíes a partir del procesu granible.
Per otra parte, la llinia de tresformación y comercialización, que cunta con 700.000 euros, amás de subvencionar iniciatives de protección medioambiental, dexa sofitar proyectos de tresformación de captures de pexe comercial que nun puedan destinase a consumu humanu ya incentiva la xeneración de nuevos o meyores productos, procesos o sistemes de xestión y organización, busca de nuevos mercaos, fomentu de la comercialización y la trazabilidá, y la promoción de productos sostenibles.
