La Universidá d’Uviéu, segundu puestu del estáu en tresparencia

La Universidá d’Uviéu pasa en cuatro años del caberu al segundu puestu del estáu en tresparencia. La institución asturiana escala veintiún puestos y comparte posición coles universidaes de Burgos y Cantabria

La Universidá d’Uviéu xube a la segunda posición nel Informe-ranking sobre tresparencia de les universidaes 2019 ellaboráu, como cada añu, pola Fundación Compromiso y Transparencia. La institución pública asturiana esguila ventiún puestos y pasa a asitiase como la segunda del país en tresparencia, xunto coles universidaes de Burgos y Cantabria.

En 2018 la Universidá d’Uviéu ocupaba’l puestu 23, considerándonse una institución tresllúcida al cumplir 38 indicadores. En 2019 la universidá asturiana cumple 50 indicadores y asítiase ente les cuatro universidaes públiques más tresparentes del país. La evolución de la Universidá d’Uviéu foi espectacular: en cuatro años, pasó d’ocupar el postreru puestu del ranking, asitiándose ente les universidaes opaques, a liderar el grupu de les universidaes más tresparentes.

L’informe de la Fundación Compromiso y Transparencia mide la tresparencia voluntaria de les universidaes y nél participaron mediu centenar d’instituciones públiques y 26 universidaes privaes. Anguaño la Fundación quixo destacar la capacidá de reacción y adaptación de les universidaes públiques frente a la crisis sanitaria provocada pola Covid-19 y sorraya que’l porcentaxe d’universidaes públiques tresparentes ye’l más altu (65%) desque s’espublizar l’informe, mientres que les universidaes calificaes como opaques amenórguense puramente a cuatro.