Salú confirma 95 nuevos casos de coronavirus n’Asturies

La Conseyería de Salú confirmó 95 nuevos casos de coronavirus detectaos ayeri, xornada na que se producieron 12 ingresos en planta y 3 en UCI. Amás, rexistráronse 4 altes hospitalaries.

Anguaño, n’Asturies hai 205 pacientes hospitalizaos con confirmación o barruntu de covid-19 y otres 93 persones permanecen n’unidaes de cuidos intensivos. Ayeri sábbadu finaron trés persones: una muyer de 86 años y dos homes de 77 y 79. El Sespa realizó’l sábadu 2.248 pruebes y la tasa de positividad asitiar nel 5,56%.

Pela so parte, la ocupación total por covid nos hospitales asturianos asítiase nel 8,5%. Nel casu de les UCI, álzase hasta’l 27,93%. Amás, nos centros convertíos pa l’atención a persones con coronavirus tán n’usu’l 3,33% de les 120 cames habilitaes.

Encamientos pa frenar l’andanciu

El Gobiernu d’Asturies encamienta a la ciudadanía a rellacionase namás con convivientes, llindar al máximu l’actividá social y evitar el contactu con persones mayores o con patoloxíes cróniques si encaróse dalguna situación de riesgu. N’especial, apela a la responsabilidá de los habitantes de L.lena, Piloña y Cangues d’Onís, amás d’aquellos otros conceyos nos que se vaiga declarando’l nivel de riesgu estremo (4+).

Recuerda tamién la importancia de permanecer en casa y aisllase de les persones coles que se convive ante l’apaición de síntomes compatibles cola covid-19 (fiebre súbita, tos o sensación de falta d’aire, perda d’olfatu y de gustu, dolores de gargüelu, musculares y torácicos, foria o cefalea). Coles mesmes, aconseya llamar per teléfonu al centru de salú o al númberu d’atención 984 100 400.

Amás, ye fundamental la responsabilidá individual de les persones que tán pendientes de la resultancia d’una PCR o que son consideraes contactos estrechos, quien han de permanecer nes sos cases, vixilar el so estáu de salú y cumplir puramente la cuarentena.

La Conseyería de Salú encamienta que los mayores de 65 años o con patoloxíes cróniques eviten espacios interiores, con mala ventilación y alta concentración de persones, sobremanera n’actividaes grupales de calter deportivu, lúdicu, social o relixosu.

Coles mesmes, les autoridaes sanitaries y educatives encamienten al alumnáu a acutar los contactos sociales pa frenar l’espardimientu del virus. Aconseyen tamiémn a les families la vixilancia activa del estáu de salú d’adolescentes y convivientes, sobremanera si estos postreros son mayores o tienen enfermedaes cróniques.

La presencia n’Asturies de la variante británica del coronavirus, que yá representa más del 96% de los casos diagnosticaos na comunidá, obliga a actuar col máximu precuru.

Aplicación Radar Covid

El Gobiernu d’Asturies emplaza a la población a descargar nos sos teléfonos móviles l’aplicación Radar Covid, una ferramienta que facilita’l llabor d’identificación y trazabilidá de posibles contactos que faigan los profesionales d’Atención Primaria y de los servicios de vixilancia epidemiolóxica. Esta tecnoloxía permite comunicar a los sos usuarios, ensin revelar la so identidá, un diagnósticu positivu, amás d’alvertir de la posible esposición al virus a otros usuarios con quien se rellacionaren.