1,3 millones pa construyir 12 viviendes públiques en Sotu’l Barcu

El Conceyu cedió al Principáu la parcela de L’Arena onde va construyise l’edificiu nuevu de pisos destinaos a arriendu social

“Siguimos apostando por un parque asequible, con edificaciones sostenibles que dexen acceder a un domiciliu a quien más lo precisen”, sorraya la conseyera Melania Álvarez

El Gobiernu d’Asturies va invertir 1.366.317 euros na construcción d’un edificiu con 12 viviendes públiques en L’Arena, que van sumase a les 23 coles que yá cunta’l conceyu de Sotu’l Barcu. El conceyu cedió al Principáu la parcela onde va construyise la construcción nueva de pisos destinaos a arriendu social.

Les viviendes van tener una superficie útil de 67 metros cuadraos y toes van cuntar con trasteru. Amás, la edificación va garantizar l’aforru enerxéticu de los inquilinos y el confort nos domicilios. Asina, va disponer de servicios centralizaos con caldera de condensación de gas natural, lo que resulta más eficiente y contribuye a amenorgar les emisiones de CO2, y el consumu va contabilizase individualmente por cada pisu. El bloque tamién va cuntar con un sistema de ventilación con recuperación de calor, un sistema que consigue aumentar la eficiencia y ufierta una calidá del aire óptima pa los usuarios.

El plazu de la obra ye de 16 meses y prevése que les viviendes puedan entregase a últimos del branu del 2023. Tocantes a la so execución, establezse que va ser menester contratar a 64 persones y establezse un porcentaxe del 10 % d’esos empleos pa persones en situación d’esclusión llaboral, como perceptores del salariu social básicu o paraes de llarga duración.

La conseyera de Derechos Sociales y Bienestar, Melania Álvarez, y el director xeneral de Vivienda, Fermín Bravo, presentaron güei’l proyectu nel conceyu de Sotu’l Barcu. A xuiciu d’Álvarez, esta iniciativa demuestra que’l Principáu sigue apostando “por un parque de vivienda públicu asequible, con edificaciones sostenibles que dexen acceder a un domiciliu a quien más lo precisen”.