Asturies va impulsar la so condición de destín de congresos, xuntes y incentivos na feria Incentives & Business Travel Market IBTM World, que se celebra na Fira de Barcelona la selmana que vien.
El Principáu participa nesti alcuentru comercial con un estand de 18 metros cuadraos onde, al llau del llabor promocional de Turismu d’Asturies, van tar trés representantes de los conceyos d’Avilés, Xixón y Uviéu cola so propia axenda comercial. Nos trés díes de congresu, Asturies y les trés ciudaes van tener xuntes con axencies promotores y responsables empresariales coles mires d’establecer alcuerdos de collaboración pa la celebración d’eventos congresuales.
Precisamente, iniciatives como la participación nesta clas de cites de calter profesional sobre manera va ser ún de los aspectos principales del plan de posicionamientu de productu pal segmentu de congresos, xuntes y incentivos impulsáu pol Principáu. Los llabores que van definir esti plan atópense en marcha y prevése que remate nes selmanes vinientes.
Esti plan de posicionamientu súmase a los enfocaos al desenvolvimientu de los productos gastronómicu y de cicloturismu, toos ellos incluyíos na Estratexa de Turismu d’Asturies 2020/2030.
Mercaos de proximidá
Dende la selmana pasada, atópase en marcha una campaña estraordinaria de promoción d’Asturies como destín turísticu nes principales ciudaes de Galicia, Castiella y Llión, Cantabria y País Vascu. Esta acción, que supón una inversión de 114.000 euros, va desenvolvese hasta Navidá y sofítase na estensión del programa de descuentos n’agospedamientos Asturpass impulsáu pol Principáu pa promover el consumu turísticu.
Esta campaña súmase a la vixente dende ochobre en mercaos con conexón aérea directa pa rentabilizar turísticamente la conectividá aérea nacional del Principáu. Les acciones nueves, que van tar actives hasta la segunda selmana d’avientu, tán desenvolviéndose en Madrid, Barcelona, Valencia, Sevilla, Málaga, Gran Canaria, Tenerife, Alicante y Mallorca. Esta llinia d’actuación supón una inversión de 600.000 euros y tien gráfiques y mensaxes específicos pa cada mercáu, con referencies a les conexones coles que cunta Asturies y animando a volar dende cada orixe al paraísu natural.
