El Gobiernu d’Asturies destinó 1,7 millones a los Centros de Dinamización Tecnolóxica Local (CDTL) pa que se conviertan en llaboratorios d’innovación social. La Conseyería de Ciencia acaba de resolver la convocatoria de sovenciones de la que se beneficien 59 conceyos con menos de 20.000 habitantes.
Cada conceyu va recibir ente 20.000 y 30.000 euros coles mires d’impulsar el tresformamientu dixital y averar la ciencia y l’innovación al territoriu. Nel casu de la mancomunidá de la Contorna de la Sidra y de la formada per Grau y Yernes y Tameza, les cuantíes ronden los 95.000 y 47.000 euros, respectivamente.
Esta convocatoria por concurrencia competitiva dexa a cada entidá local diseñar les actividaes que meyor s’afaigan a les necesidaes de la so población, al empar que da cobertoria al serviciu de personal qu’atiende los CDTL.
Amás de cursos de formación en materia tecnolóxico pa la ciudadanía, los conceyos tamién desenvolvieron actividaes pal fomentu de les vocaciones científiques ente l’alumnáu, según conferencies y talleres con especialistes en distintes disciplines.
La Conseyería de Ciencia, Innovación y Universidá trabaya yá na convocatoria d’ayudes p’anguaño, con una medría na partida hasta 1,8 millones, coles mires de desenvolver programes venceyaos al usu de la tecnoloxía 5G y otres ferramientes que favorezan el tresformamientu económicu na área rural.
