Los conceyos del noroccidente tamién se suman a la rede pública, autonómica y gratuita de 0 a 3 años de Les Escuelines. La Conseyería d’Educación recoyó l’adhesión d’A Veiga, Castropol, Tapia, El Franco, Cuaña y Navia. Con estes incorporaciones, el cómputu total de conceyos que declararon la so voluntá d’integrase xube yá a 37.
La conseyera d’Educación, Lydia Espina, axuntóse esta mañana coles alcaldeses d’El Franco, Cecilia Pérez; de Cuaña, Rosa González, y de Navia, Ana Isabel Fernández; colos alcaldes de Castropol, Francisco Javier Vinjoy, y de Tapia, Pedro Fernández, y col teniente d’alcalde d’A Veiga, Pablo Fernández, pa esplica-yos la llei, responder a les sos consultes y recoyer información sobre’l funcionamientu y la estructura de les sos escueles municipales.
Nel casu de Tapia, el Gobiernu d’Asturies va construyir esti añu, na Fase 1, una escuela autonómica na antigua casa del conserxe del Colexu Públicu Príncipe d’Asturies. L’alministración ta peracabando’l proyectu y la previsión consiste n’inaugurala antes de final d’añu.
Nel casu d’A Veiga, Castropol, El Franco, Cuaña y Navia, trátase d’integrar les escueles municipales que tienen en funcionamientu nestos momentos, col mesmu númberu d’unidaes coles que cunten. De cara a la segunda fase, que se va desenvolver en 2025, va estudiase la posibilidá d’abrir dalguna más en dalgún d’estos conceyos, aprovechando siempres l’espaciu disponible en colexos públicos.
La conseyera comentó colos alcaldes la singularidá de les llistes d’espera d’esta contorna, que tán interconectaes. Les families piden plaza en más d’un centru, polo que suel haber duplicidá de solicitúes. Por esa razón, quedaron n’esperar a que s’inaugure la escuela de Tapia p’analizar l’impactu qu’esta escuelina va tener na zona. Dempués volverán comprobar la situación y a afaer la planificación.
Per otru llau, Lydia Espina anunció que’l Gobiernu d’Asturies va aceptar un allegamientu pa introducir na llei tamién la denominación en eonaviego As Escolías.
