El Gobiernu d’Asturies va poner en marcha güei, día 25 de xunetu, el nuevu programa de bonos de turismu rural, una iniciativa diseñada pa incentivar les estancies n’agospiamientos d’esti tipu mientres la temporada media y baxa. La midida, alcordada col sector, busca atraer visitantes, dinamizar la economía local y siguir construyendo un modelu turísticu más equilibráu y sostenible. Los bonos van poder descargase a partir de mañana dende la web oficial del programa: bonosturismoruralasturias.com

Con una inversión de 600.000 euros del presupuestu autonómicu d’esti añu, la iniciativa va dexar la emisión de’alredor de 8.000 bonos dixitales, que van ufiertar un descuentu directu de 75 euros en reserves de dos nueches consecutives a lo menos. Los bonos funcionen como tickets prepago, cofinanciaos a partes iguales pola persona usuaria y el gobiernu asturianu.

Los vales preséntense en formatu dixital y podrán guardase nel móvil por aciu un códigu QR compatible con aplicaciones tipu wallet. Cada persona va poder beneficiase d’un máximu de dos bonos.

Nel casu de cases d’aldega de contratación íntegra o apartamentos rurales, va dexase l’usu de dos cupones nuna mesma reserva, siempres que se contraten a lo menos cuatro places.

El periodu para esfrutar de los descuentos va estendese del 16 de setiembre al 31 d’avientu. Pa ello, va ser necesario realizar la reserva en dalgún de los agospiamientos rurales xuntaos al programa. El plazu de participación pa los establecimientos va permanecer abiertu hasta’l 29 de xunetu, incluyíu.

El Gobiernu del Principáu articuló, amás, una campaña de promoción pa sofitar l’espardimientu de los bonos y potenciar el consumu nel sector rural, un turismu que nació precisamente n’Asturies.

Con esta iniciativa, l’Executivu autonómicu cumple’l compromisu adquiríu con esti sector, col que ta dafechu comprometíu, y refuerza el so apueste pola desestacionalización, l’atracción de nuevos públicos y la puesta en valor del territoriu como un destín calidable en cualquier dómina del añu.