La Residencia Lliteraria Xixón ta acabante abrir les sos puertes como la primera del so tipu n’Asturies. El proyectu diríxelu l’escritor y xestor cultural Inaciu Galán y busca atrayer escritores d’otros territorios y otres llingües, asina como abrir pontes de diálogu ente la lliteratura asturiana y otres lliteratures del mundu.
Nos últimos años la lliteratura ta poniéndose en valir con formes nueves como les residencies lliteraries, que van abriéndose pasu nel panorama cultural pali que pali. Asturies nun cuntaba hasta agora con nengunu d’estos espacios dedicaos a da-y abellugu a escritores, que per un determináu tiempu, tienen accesu a un espaciu nel que poder apartase del so día a día pa facer lo que meyor saben, escribir, crear arte…
L’escritor y xestor cultural Inaciu Galán vivió nesti espaciu a lo llargo de cuasi una década y pon a disposición l’apartamentu agora pa la creación lliteraria dende Xixón, buscando tender ponter con otres lliteratures, otres llingües, otres cultures…
Parte de la so biblioteca particular ta a disposición de los y les residentes que pasen una temporada escribiendo na agora Residencia Lliteraria Xixón. La biblioteca disponible na Residencia Lliteraria Xixón permite conocer a fondu la lliteratura asturiana contemporánea, asina como otres peninsulares.
La esperiencia na residencia pasa tamién por organizar eventos fuera del espaciu pa dar a conocer a los y les autores residentes en Xixón y n’Asturies. Pa ello, y d’alcuerdu colos escritores residentes y les sos circunstancies, entámense en cada visita presentaciones llibros, charres col autor o autora y otres actividaes pa les que se cunta col texíu públicu y priváu de Xixón.
La Residencia Lliteraria Xixón ye un espaciu urbanu pensáu pa la estancia d’escritores en periodos de tiempu nos que van dedicase a la creación lliteraria o la traducción de distintos xéneros. «Trabayamos pa convertinos nun puntu cultural de referencia nel mapa de les residencies que van acoyendo distintes ciudaes nos últimos años», esplica Inaciu Galán.
La residencia permitir atrayer talentos culturales a la ciudá de Xixón, aportando un llugar nel que trabayar cola proyección que supón la rede d’establecimientos y eventos públicos y privaos qu’alredor de la lliteratura se celebren nel conceyu.
