Adrián Barbón confirmó güei que la rede d’escueles infantiles públiques, anguaño formada por 77 centros, va ser dafechu gratuita dende’l cursu 2024-2025. El presidente del Principáu tamién aprovechó’l postreru plenu de la Xunta Xeneral pa numberar un llargu llistáu d’inversiones realizaes o previstes n’Asturies. Son, al so xuiciu, la prueba de que “vamos na sienda correcta escontra la nueva economía verde, dixital y sostenible”.
L’aprobación del presupuestu de 2023 va dexar qu’el 80% de les families quede exentu de pagu nes escueles infantiles. Esa meyora, que se va aplicar este mesmu añu, va rematar el próximu mandatu cola gratuidá total y l’integración na rede educativa autonómica, una demanda compartida de los conceyos y de la plantiya d’estos centros.
La última sesión d’entrugues al presidente bazcuyó ente balances de los últimos años y adelantos pa la próxima llexislatura. El referíu a la rede de 0 a 3 foi unu de los asumíos pol xefe del gobiernu, quien tamién se comprometió a tramitar el proyectu de llei de retu demográficu –repitió que va ser la primer iniciativa que va presentar al parlamentu-, el de derechos de les persones LGTBI o la reforma del Estatutu, que va facer posible la oficialidá del asturianu y del eonaviego.
“Nós yá tamos pensando nel día 29”, afirmó Barbón, convencíu de la so victoria’l 28 de mayu. “Vamos demostrar que puede ganase y gobernar ensin faltar”, manifestó, de la qu’alvertíu que la xornada electoral non se dirimirá namá en términos de derecha y esquierda, sinón tamién “de meyora o de involución”. Col mesmu razonamientu argumentó que VOX, “que ye la involución”, convirtióse en “la última esperanza del Partíu Popular” pa llegar al poder n’Asturies.
