El presidente del Gobineru asturianu, Adrián Barbón, afirmó esti miércoles que «si tuviera competencies, establecería controles muncho más refechos y zarraría les fronteres con aquellos llugares nos qu’hai biltos». El xefe del Executivu, que fizo estes declaraciones nuna entrevista a la cadena COPE, recordó les crítiques que recibió n’afirmando que consideraba una temeridá que delles comunidaes autónomes transitaren de fase 2 a la nueva normalidá ensin pasar pola fase 3. «Eso llámase prudencia y rigor; y lo contrario ye lo que tamos viviendo. Que se reactivaron los biltos d’una forma muncho más rápida. Y ye interesante qu’aquellos que tanto criticaron l’estáu d’alarma agora vean la necesidá de declarar otru estáu d’alarma», manifestó.
En relación al positivu en coronavirus rexistráu ayeri n’Asturies, el presidente señaló que’l fechu de qu’esti home aisllárase en tornando de Cataluña y tener los primeros síntomes, va facilitar que s’evite la espansión del virus. Nesti sentíu, aportunó que, en casu de carecer síntomes compatibles cola COVID-19, hai que ponese darréu en contactu telefónicu col centru de salú. «Nel contestu actual, lo importante ye detectar rápido los biltos y actuar sobro los contactos estrechos pa torgar que se convierta en daqué incontroláu».
Barbón tamién destacó que’l Gobiernu va inspeccionar toles residencies, públiques y privaes, lo qu’amuesa la esmolición del Principáu poles persones mayores. Sicasí, sorrayó que los xeriátricos privaos «tienen de cumplir colos protocolos sanitarios que s’establecen y asumilo como una parte más de los costos para poder exercer la so actividá».
