Había gran espectación polo que pudiera salir de les declaraciones que programó pa güei pela mañana’l diputáu y secretariu xeneral de Foro Asturias, Adrián Pumares. Tres cuasi cuatro díes de silenciu, los diferetnes análisis auguraben dende una dimisión de tolos cargos hasta que caltuviera l’acta pero fuera de la disciplina del partíu qu’a güeyos de la ciudadanía lu traicionó’l sábadu pasáu al pactar con VOX, la fuercia política d’estrema derecha qu’acosó de forma brutal a Pumares pol so sofitu a la oficialidá, campañes con valles incluyíes.
Sicasí, nada d’eso ocurrió. Adrián Pumares solucionó tol conflictu esplicando que se sentía «incómodu» col pactu, pero aceptando absolutamente l’autoridá de Carmen Moriyón y la llamada «autonomía llocal» pa facer pactos, xusto la qu’él nun tuvo cuando quería aprobar la oficialidá del asturianu. Sigue nos cargos y sigue nel parllamentu embaxo la disciplina de la formación qu’agora comparte gobiernu con VOX tres prometer en campaña que nunca pactaríen con ellos la mesma Moriyón. Les humildantes campañes que tanta solidaridá-y traxeron nun fueron abondo pa que’l diputáu de Llaviana nun quixera participar de l’apertura de les insituciones asturianes a VOX.
El descontentu sigue nos sectores más lliberales y asturianistes de la organización, que vivieron yá la dimisión de cargos relevantes como José Suárez Arias-Cachero «Felechosa», Inaciu Iglesias o Carlos Suárez, cabezaleru de la organización n’Uviéu.
Otros miembros de candidatures yá dimitieron n’Uviéu y Villaviciosa, onde l’agrupación, de marcáu calter demócrata y asturianista, vive un gran descontentu y desilusión poles pallabres d’Adrián Pumares, qu’esperaben que liderara una oposición clara y contundente al pactu cola estrema derecha. L’agrupación espera pa tomar decisiones la vuelta de les vacaciones de Xicu Yepes, referente del partíu nel conceyu, que marchaba esti llunes y vuelve la selmana qu’entra.
