El rector de la Universidá d’Uviéu, Santiago García Granda, y el presidente de la Beijing Union University, Han Xianzhou, roblaron esti mediudía un alcuerdu de collaboración. Han Xianzhou visitó la institución académica, acompañáu d’una delegación de la institución china. Foi recibíu nel edificiu Hestóricu primeramente pol vicerrector de Proyección Internacional, Francisco José Borge.
Han Xianzhou apaeció acompañáu por Germán Carbayos, director xeneral de la Fundación Escuela de Mareo, cola que tamién roblaron un alcuerdu de collaboración. La puerta quedó abierta para desenvolver nel futuru proyectos académicos y d’investigación a trés bandes, ente les dos instituciones docentes y l’equipu xixonés. La delegación china axuntóse tamién con representantes de la Escuela Politécnica d’Inxeniería de Xixón, la Facultá d’Economía y Empresa, la Facultá de Bioloxía y la Fundación pa la Investigación Biosanitaria d’Asturies (FINBA).
