Alimerka anunció ayeri’l pieslle de cuatro tiendes en Xixón. La cadena de supermercaos toma esta decisión, qu’afecta a 26 de los 166 establecimientos que tien n’Asturies, pol «momentu escepcional que vivimos». Les tiendes afectas son les de les cais 17 d’agostu, 6 (Begoña); Ezcurdia, 132 (L’Arena); Eleuterio Quintanilla, 28 (El Llano); y plaza Ciudá de l’Habana, 1 (Moreda). La compañía. que garantiza l’abastecimientu de les sos tiendes, argumenta la decisión pa «protexer el bienestar de la plantilla y los veceros y garantizar la continuidá del serviciu».
El pieslle de tiendes afecta a aquellos casos onde esisten dos supermercaos cerca. «Pesllamos una d’elles y asina una parte del personal pue pasar, na midida de lo posible, el periodu de confinamientu coles sos families. D’esta manera tamién aseguramos qu’heba personal que pueda sustituyir a quien caya enfermu», espliquen. Nun comunicáu, la empresa aclara que’l personal afeectáu va siguir percibiendo’l so sueldu de forma íntegra. «Queremos protexer a les persones y garantizar el serviciu. En nengún casu va haber un problema de suministru y serviciu nes nueses tiendes».
Estes nueves midíes súmense a les yá adoptaes por Alimerka nos caberos díes. La cadena de supermercaos amenorgó el so horario dende esti llunes, pasando a abrir de 10 a 20 horas pa agilizar la reposición d’artículos. Tamién comunicó’l pagu d’una prima de 800 euros a tolos trabayadores que siguen nel so puestu mientres dure l’estáu d’alarma.
