Alredor de 1.200 estudiantes de catorce colexos ya institutos asturianos tán participando nunos talleres prácticos de comunicación impartíos por periodistes profesionales de l’Asociación de la Prensa d’Uviéu.
Los talleres, que lleven por títulu Aprendamos a entender los medios de comunicación y les redes sociales, van empobinaos a alumnáu de Secundaria y Bachilleratu. El so principal oxetivu ye averar el llabor periodísticu a la mocedá dende una perspectiva divulgativa y educativa.
Los profesionales pretenden tresmitir al alumnáu la importancia del periodismu na sociedá actual, amás d’ayudar a estremar la información contrastada de les noticies falses (fake news) y a buscar fontes fiables. Tamién-yos falen sobre la necesidá de fomentar l’espíritu críticu nel usu de les nueves tecnoloxíes.
Los talleres de comunicación, de cuatro hores de duración y una orientación bien práctica, son frutu d’un conveniu de collaboración suscritu ente’l Gobiernu d’Asturies y l’Asociación de la Prensa d’Uviéu, y retomen una actividá que se desenvolviera con ésitu en 2016 y 2017. La formación involucra a una ventena de periodistes, que se repartieron ente la ellaboración de los conteníos, la docencia y la organización.
