El Conseyu de Gobiernu, axuntáu güei en Coaña, decidió les cinco Medayes d’Asturies que se van conceder esti añu. Les máximes distinciones institucionales de la comunidá –que van ser aprobaes formalmente nuna sesión posterior- premien nesta ocasión cinco trayectories de compromisu vital cola política útil, el periodismu de calidá, les llibertaes, la medicina preventiva y l’arte con conciencia.
El próximu 8 de setiembre, con motivu del Día d’Asturies, van recibir esta reconocencia les siguientes persones:
• Aníbal Vázquez Fernández (Mieres, 1954-2023). Mineru dende los 18 años, la llucha por unes condiciones llaborales dignes y pola seguridá de les esplotaciones marcó’l so llabor profesional y forxó’l so calter combativu y solidariu. Fíu y padre de picadores, foi unu de los impulsores de l’Asociación Cultural y Minero Santa Bárbara, defensora del patrimoniu venceyáu a l’actividá extractiva. Militante de Comisiones Obreres y d’Izquierda Xunida, en 2011 llogró l’alcaldía de Mieres por mayoría absoluta, cargu que revalidó sucesivamente hasta’l so fallecimientu en 2023. Foi reconocíu unánimemente como unu de los rexidores más queríos de Mieres.
• Marcelino Gutiérrez González (Samartín del Rei Aurelio, 1975-Xixón, 2023). Llicenciáu en Ciencies de la Información pola Universidá Pontificia de Salamanca, desenvolvió tola so carrera profesional n’Asturies. Desque s’incorporó en 1998 al diariu El Comerciu convirtió la so precoz vocación pol periodismu na so verdadera pasión. Con esti impulsu dirixió’l periódicu dende 2016 hasta la so repentina ya inesperada muerte, en septiembre de 2023. Apurríu al so oficiu, convirtióse nun referente del periodismu de calidá, veraz y comprometíu cola so tierra.
• Adonina Tardón García (Madrid, 1953). Foi la primera y única muyer caderalga de Medicina Preventiva y Salú Pública de la Universidá d’Uviéu y, según el ranking del Centru Cimeru d’Investigaciones Científiques de 2022, ye la científica asturiana más destacada a nivel nacional. Desenvolvió un prolíficu llabor n’epidemioloxía ambiental, medicina preventiva y salú pública. Anguaño lidera como investigadora principal el proyectu européu Cancer prevention at work, que busca erradicar la bacteria Helicobacter pylori, principal factor de riesgu del cáncer d’estómagu.
• Consuelo Vallina González (Ribesella, 1941). Pintora, grabadora y ceramista, estudió na Escuela d’Arte d’Uviéu y n’otros centros de Barcelona y Venecia. Nes sos obres, d’arte astracto, remana tintes sobre llana, seda y algodón pa llograr distintes gradaciones de color y testura. Los sos trabayos, ente los que tamién destaquen los tapices, espunxéronse n’España, Polonia, Italia y Estaos Xuníos. Feminista y comprometida, preside l’Asociación d’Artistes Visuales d’Asturies y ye socia d’honor de la Unión d’Artistes Contemporaneos d’España.
• Pablo García Fernández (Samartín del Rei Aurelio, 1934). Representante d’una xeneración d’asturianos y asturianes a la que-y debemos la llibertá y la democracia afiguraes na Constitución de 1978. Una de les figures más destacaes del socialismu asturianu, Presidente de la FSA en 2012 y Presidente d’Honor vitaliciu dende 2017. Cuenta con una amplia trayectoria na llucha contra la dictadura franquista y de compromisu coles llibertaes y la llucha obrera. Foi’l primer Alcalde democráticu de Llaviana (1979-1983) y unu de los dos primeros senadores por designación autonómica, responsabilidá qu’ocupó dende 1983 hasta 1999. Presidente de la Fundación José Barreiro dende la so constitución en 1985 hasta 2023, anguaño ocupa la so Presidencia d’Honor. De reconocía bonhomía, ta íntimamente venceyáu a Llaviana, onde la so familia s’instaló en 1942.
Fíu predilectu
El Conseyu de Gobiernu tamién alcordó proponer la concesión del títulu de fíu predilectu al cardenal gozoniegu Ángel Fernández Artime. Tres la so aprobación formal, la propuesta va unviase a la Xunta Xeneral.
• Ángel Fernández Artime (Gozón, 1960). Llicenciáu en Filosofía, Pedagoxía y Teoloxía Pastoral, dende 2014 ye’l rector mayor de la congregación salesiana y el 30 de setiembre de 2023 foi nomáu cardenal pol papa Francisco. Dende’l pasáu ochobre forma parte del Dicasteriu pa los Institutos de Vida Consagrada y les Sociedaes de Vida Apostólica de la curia romana. Ente otros cargos, foi director del colexu de la congregación n’Ourense y superior de la Inspectoría Arxentina Sur de los salesianos, en Buenos Aires. Ye’l séptimu cardenal asturianu de la hestoria.
Fíos adoptivos
L’Executivu alcordó, amás, propunxo la concesión del títulu de fíos adoptivos a los hispanistes franceses Yvan Lisorgues y Jean François Botrel, consideraos los máximos espertos mundiales en Leopoldo Alas ‘Clarín’ y grandes difusores de la so obra. Precisamente, en 2024 cumpliéronse 140 años de la primer edición de La Rexenta. Dambos son autores del llibru Leopoldo Alas ‘Clarín’, ‘La Rexenta’ y l’obispu, de recién publicación. Esta propuesta tamién va ser treslladada a la Xunta Xeneral, una vegada aprobada formalmente.
• Yvan Lissorgues (Aveyron, 1931). Catedráticu eméritu de la Université de Toulouse-Le Mirail, ye especialista na lliteratura española de los sieglos XIX y XX. El so trabayu de doctoráu céntrase en Clarín, sobre’l que tamién publicó dellos llibros y artículos. Ente otres distinciones, recibió la Medaya d’Oru al Méritu nes Belles Artes (1989) y la Encomienda de la Orde de Sabel la Católica (2009).
• Jean François Botrel (Rennes, 1942). Catedráticu eméritu de Llingua y Cultura Hispániques de la Université Rennes 2, dedicóse especialmente al estudiu de la lliteratura y la prensa. Sobre Clarín publicó, ente otros, los testos ‘Clarín’, práctica y teoría del periodismu y Novela ya ilustración: La Regenta leída y vista por Juan Llimona, Francisco Gómez Soler y demás, Francisco Gómez Soler y demás. En 2005 recibió la Encomienda de la Orde de Sabel la Católica.