La Conseyería de Presidencia empecipió güei la demolición de les edificaciones amiestes a la fuesa d’El Chabolu, na localidá d’El Rellán, nel conceyu de Grau. Trátase d’un espaciu cercanu a la zona na que yá se produció la exhumación de restos de 38 persones y onde se toparon nicios abondos sobro la esistencia de más víctimes.
El trabayu de demolición y recuperación paisaxística de la zona, que cunta con un presupuestu de 41.060 euros, implica la eliminación d’unes naves n’estáu de ruina y va dexar siguir coles exhumaciones que ta llevando a cabu na zona l’Asociación pa la Recuperación de la Memoria Histórica. Tratar del segundu valtamientu del que s’encarga’l Principáu, que na primer fase de les escavaciones tuvo que retirar tamién una plataforma de formigón pa facilitar la meyora de los llabores.
L’Asociación para la Recuperación de la Memoria Histórica intervieno en 2021 na fuesa de La Chabona nuna zanxa de más de diez metros, onde se recuperaron restos de 15 persones y se documentaron evidencies d’una más, soterrada so la estructura de lo que foi una granxa de gochos, lo que fixo pensar que so la edificación podríen atopase más cuerpos. Esta hipótesis confirmóse nes escavaciones d’anguaño, yá que la continuación de los trabayos dexó recuperar los restos d’otres 23 víctimes. Mientres esta última intervención, realizada n’abril, comprobóse que les inhumaciones podríen siguir so eses edificaciones.
N’abril recuperáronse numberosos oxetos personales. Asina, na trinchera y al pie de los restos humanos topáronse útiles d’aséu como cuchielles d’afeitar, peñes, pequenos espeyos y frascos, amás d’oxetos más personales, como gafes, una medaya de la Virxe de Cuadonga, un aniellu y una febiella con iniciales, lápices, mecheros, etcétera.
L’Asociación para la Recuperación de la Memoria Histórica tomó amueses d’ADN a cuarenta familiares que tienen pistes de que los sos seres queríos fueron asesinaos y soterraos nesi llugar.
