Les obres de dragáu del puertu de L’Arena, en Sotu’l Barcu, entamaron esta mañana. Estos trabayos, axudicaos a la empresa Marcor Xove S.L, tienen un plazu d’execución de cuatro meses y van dexar aumentar el caláu, tanto na zona d’amarre como na bocana d’entrada, tres la estracción de cerca de 20.000 metros cúbicos de sable, barru y algues.
El dragáu ta efectuándose dende’l mar, utilizando una embarcación, y tamién dende tierra, emplegando una retroescavadora que trabaya dende’l cantil y que va dir cargando les borrafes sobre un camión. Va haber dos niveles de dragáu: na zona este d’amarres afitaráse un caláu de, a lo menos, 1,5 metros de fondura, mientres que nel restu del puertu, incluyendo la bocana, van algamase a lo menos los 2,5 metros.
Esta intervención va correxir l’acción permanente de les corrientes de la ría, qu’apurren de forma continua sedimentos procedentes del ríu Nalón. Tamién va arreglar los problemes que xeneren los depósitos de sable y otros materiales que lleguen al puertu y enzanquen les maniobres de la flota pesquero y deportivo de L’Arena.
