El Principáu punxo en marcha güei les obres de meyora de la carretera AS-23, que xune les localidaes de Mántaras (Tapia) y Llagar (Castropol), nel tramu de 5,4 kilómetros que dixebra l’enllaz cola N-634 y la localidá d’A Roda. L’actuación, que s’axudicó en 434.299 euros, cuenta con financiamientu del Fondu Européu de Desenvolvimientu Rexonal (Feder).
L’AS-23 ye una importante exa de comunicaciones comarcal, tanto pa la zona interior del propiu conceyu de Tapia de Casariego como para dar accesu a la carretera N-634 y a l’autovía del Cantábricu, dexando la movilidá escontra estes víes dende les comarcales AS-31 (As Figueiras- A Roda), AS-32 (Tol- Serantes) y otres víes d’ámbitu local.
La meyora d’esta exa comarcal va facilitar la movilidá de los habitantes del mediu rural, reforzando la seguridá y fiabilidá de la vía nos sos desplazamientos. Les obres van consistir na llimpieza y el fresado de la vía p’aplicar, darréu, dos capes d’asfaltu d’amiestu bituminoso en caliente: una de regularización y otra de rodadura de 5 centímetros d’espesura. Amás, tamién tán previstes actuaciones p’ameyorar el drenaxe de la carretera. Ente elles, destaquen l’allongamientu de dos caños, la sustitución d’otru, la execución de drenaxe soterrañu y la construcción de 380 metros de cuneta de tipu bordiellu y otros 230 metros de cuneta tipo ‘V’. A lo último, van reponese les balices y va anovase la señalización vertical y horizontal del vial nel tramu.
