La Conseyería de Mediu Rural y Cohesión Territorial empecipió les obres d’urbanización de los terrenes lliberaos pol soterramientu de les víes de tren d’anchu métricu en Llangréu y la meyora de los accesos al polígonu de Valnalón. Los trabayos, axudicaos por 6,7 millones a la unión temporal d’empreses (UTE) Víes-Alvargonzález, tienen un plazu d’execución de 15 meses.
L’actuación entiende toles midíes necesaries pa urbanizar los espacios lliberaos pol soterramientu de les víes de Feve al so pasu per Llangréu. Con esta intervención, que toma dos kilómetros llineales de terrén, pretende xenerase un gran bulevar central con un paséu piatonal rematáu con zones verdes, carriles bici y distintos elementos de moblame urbanu, al empar que s’ameyora la integración d’esta zona cola trama urbana yá consolidada, en que los sos llendes van ampliase ceres y va amontase l’accesibilidá.
Amás, va ordenase’l tráficu urbanu na redolada y van habilitase delles zones d’aparcamientu en superficie pa favorecer la permeabilidá ente les distintes árees de la ciudá, daqué qu’hasta agora nun yera posible pola barrera ferroviaria. Los llabores, que se desenvuelven en coordinación col Conceyu de Llangréu, van incluyir tamién trabayos de xardinería y la dotación de nuevu allumáu y zones d’ociu susceptibles d’allugar xuegos infantiles o árees de xerontoximnasia.
Igualmente, va acondicionase’l vial d’accesu al polígonu de Valnalón, que cunta con un llargor averáu de 600 metros y va convertise nel accesu principal a esta zona industrial. D’esta miente, va llograse descongestionar la entrada actual, que soporta un eleváu tráficu. El vial esistente ye demasiao estrechu y nun dexa l’encruz de dos vehículos en sentíos opuestos, polo que se proxectó una sección con dos carriles d’anchu variable, d’ente 3,15 y 3,50 metros cada unu.
Unu de los principales retos técnicos d’esta urbanización ye executar les obres de manera paralela a los trabayos de Adif pal desmontaje de la vía en superficie y la puesta en serviciu del trazáu soterráu. Col fin de facilitar la coordinación, el Principáu empezó les actuaciones pol acondicionamientu del vial d’accesu a Valnalón. El Adif tien axudicaos los ocho contratos nos que s’estremaron los trabayos pa rematar les obres del soterramientu, que superen los 35 millones, a los qu’hai que sumar el costu de la renovación integral de la vía de la llínea Xixón–Llaviana.
