El Conseyu de Gobiernu aprobó güei’l decretu que modifica’l Reglamentu de la Llei d’Ordenación del Territoriu y Urbanismu (ROTU). Esta revisión va dexar la entrada a valir, 20 díes dempués de la publicación del alcuerdu nel Boletín Oficial del Principáu (Bopa), d’una serie de midíes que, ensin llegar al algame de la nueva Llei d’Ordenación Integral del Territoriu (LOITA), anguaño n’ellaboración, van dexar simplificar, entainar y facilitar la tramitación urbanística.
Los cambeos introducíos nel reglamentu súmense al conteníu de la Llei de Midíes Alministratives Urxentes, que yá enceta soluciones na xestión urbanística como la simplificación del entamu d’actividaes económiques o acciones edificatorias menores por aciu una declaración responsable o la centralización de los informes sectoriales al traviés de la Comisión d’Urbanismu y Ordenación del Territoriu (CUOTA).
La revisión del testu tamién s’afai a los cambeos llegales que se fueron asocediendo en materia urbanístico a nivel estatal, según al cambéu de modelu nel sector. Ello ye que’l principal oxetivu del reglamentu ye impulsar l’actividá nel mediu construyíu consolidáu, tantu en ciudaes como en poblaciones rurales, en llugar d’enfocar l’ordenamientu escontra la creación de nueva trama rural o urbana.
El documentu tamién escuerre flexibilizar la tramitación y dotar a les alministraciones locales de ferramientes segures pa intervenir nos cascos urbanos o en barrios vulnerables. Nesti sentíu, el nuevu reglamentu precisa la regulación del suelu urbanu, incorpora les actuaciones de dotación pública, potencia l’usu de los planes especiales de reforma interior (PERI), ye más esixente cola viabilidá económica de les operaciones urbanístiques y regula los complexos inmobiliarios.
En cuanto al suelu non urbanizable, esclaria los criterios de delimitación de los núcleos rurales y el réxime d’usos y edificación de cada categoría. Amás, unifíquense los criterios de parcelación y agrupación, ampliar hasta los 500 metros cuadraos la capacidá edificatoria residencial nes parceles grandes y déxase que los planiamientos municipales establezan les distancies de los zarros de les finques a los caminos.
El testu fai posible, coles mesmes, que’l planiamientu municipal delimite, por aciu motivación espresa, árees o ámbitos nos que sía posible la implantación de vivienda unifamiliar non venceyada a la esistencia d’una esplotación agraria, de la qu’abre la posibilidá de construyir nueves naves ganaderes de forma escepcional.
El Principáu afonda con esta reforma nel cambéu de modelu urbanísticu y territorial empecipiáu cola Llei de Medies Urxentes, que sigue con esti nuevu reglamentu y va rematar cola LOITA.
