El Gobiernu d’Asturies aprobó güei, coincidiendo col Día Internacional de les Muyeres, el primer Plan d’Igualdá, que engloba tolos ámbitos del empléu públicu n’Asturies: funcionariado de l’Alministración autonómica, personal llaboral, personal docente non universitariu y personal estatutariu del Serviciu de Salú (Sespa). Esti documentu va facilitar, ente otres iniciatives, la creación d’una bolsa d’hores pa conciliación y va dar prioridá a les xuntes ente les 9:00 y les 14:00 hores.
El plan, sofitáu por unanimidá por toles organizaciones sindicales que formen parte de la Mesa Xeneral de Negociación de l’Alministración, articúlase al rodiu de trés exes:
Cultura organizativa. Esti apartáu tien por finalidá avanzar escontra un cambéu na organización qu’evite desigualdaes.
Les persones. Esta exa céntrase na promoción de condiciones llaborales que xeneren equidad y en la erradicación de cualquier tipu de discriminación, directa ya indirecta. Ente otros oxetivos, búscase amenorgar les fiendes de xéneru, garantizar redolaes segures que dexen encarar eventuales comportamientos sexistes y avanzar na corresponsabilidad na Alministración. Pa ello, van fomentase aquelles condiciones que dexen conciliar la vida personal, familiar y llaboral. Nesti sentíu, va poner en marcha una bolsa d’hores pa cubrir necesidaes de conciliación del personal público y va dase prioridá a la celebración de xuntes dientro del horariu fixu de trabayu: de 9:00 a 14.00 hores.
Los procesos de trabayu. El propósitu fundamental d’esti apartáu ye integrar la perspectiva de xéneru nos procedimientos de la xestión pública. Esti oxetivu implica, ente otres cuestiones, avanzar nel usu del llinguaxe non sexista en toles instancies de l’Alministración ya incluyir clauses d’igualdá nos procesos de contratación pública, la concesión de subvenciones y la firma de convenios.
Tocantes a les midíes concretes previstes p’anguaño, destaquen la ellaboración d’una guía sobro la integración de la perspectiva de xéneru na xestión pública y la puesta en marcha d’una canal de consulta y denuncia en materia d’igualdá. Amás, l’Institutu Asturianu d’Alministración Pública Adolfo Posada, que yá tien esperiencia sobro la formación n’igualdá y la prevención de violencies sobro les muyeres, va reforzar los cursos nesti campu a lo llargo de los próximos meses y va incorporar formación especializada en 2025.
