El Gobiernu d’Asturies aprobó güei la creación de les 349 primeres places d’enfermería especialista del Serviciu de Salú d’Asturies (Sespa). Los nuevos puestos, que se van cubrir a partir de xineru y van distribuyise ente les ocho árees sanitaries, inclúin les especialidaes de familia (204), pediatría (72), salú mental (65) y trabayu (8).
La creación d’estes places efectuóse por aciu un cambéu de la plantiya orgánica del Sespa pola que se tresformen places xenerales d’enfermería yá esistentes en nuevos puestos especializaos.
La distribución de places por árees sanitaries ye la siguiente:
Área sanitaria I: 16 places.
Área sanitaria II: 8 places.
Área sanitaria III: 43 places.
Área sanitaria IV: 116 places.
Área sanitaria V: 111 places.
Área sanitaria VI: 14 places.
Área sanitaria VII: 18 places.
Área sanitaria VIII: 23 places.
Al marxe d’esti cambéu, tamién s’anova la denominación d’otres 128 places de matrones, que pasen a convertise en puestos de la especialidá d’enfermería obstétrico-xinecolóxica.
Dende agora, el Sespa va constituyir les bolses de demandantes d’empléu –de personal temporal y de promoción interna- pa la provisión de les places. Asina, va convocase un procedimientu estraordinariu pa la inscripción, la valoración de méritos y la mesma creación de les bolses en caúna de les especialidaes. Mientres el procesu d’implantación de les nueves categoríes va poder facilitase l’accesu al traviés de convocatories específiques de promoción interna temporal.
El Serviciu de Salú tien previstu cubrir les places, en función del orde de puntuación llográu, a partir de xineru de 2025.
El cambéu autorizáu pol Conseyu de Gobiernu ta recoyíu nel decretu 41/2023, de 7 de xunetu, de la Conseyería de Salú, pol que se crea la categoría d’enfermera especialista ente’l personal estatutario del Sespa. La norma establez que la dotación d’estes places nes distintes especialidaes va llevar a cabu de forma progresiva, por aciu la creación de nuevos puestos o la reconversión d’otros yá esistentes.
