El Gobiernu d’Asturies pon en marcha n’Arxentina los primeros puntos de sofitu al retornu nel esterior. La directora xeneral d’Emigración y Polítiques de Retornu, Olaya Gómez Romano, inauguró ayeri’l primeru d’ellos nel Centru Asturianu de Buenos Aires, y el martes va facer lo propio en Mar de la Plata.
L’Executivu busca con esta iniciativa pilotu reforzar la so presencia nel esterior pa “facilitar, favorecer y fomentar” la torna de la población emigrada a esti país, nel que viven unos 35.000 asturianos y asturianes, según esplicó la directora xeneral.
El serviciu, yá activu, va emprestar dende la see del Centru Asturianu de Bonos Aires, nel marcu del puntu d’atención social col que cunta l’equipamientu y dende’l qu’ufierta sofitu a persones emigrantes asturianes en situación de dificultá n’Arxentina.
“Detectemos n’Arxentina una alta demanda d’información sobre les oportunidaes de retornu a Asturies, que prevemos que s’amonte notablemente pol impactu de la Llei de Memoria Democrática impulsada pol Gobiernu central, conocida como la Llei de Nietos. Dende’l Gobiernu queremos tar al llau de toes eses persones favoreciendo’l so asentamientu n’Asturies”, precisó Romano.
Estos dos puntos nel esterior van trabayar de forma coordinada cola oficina de la torna d’Asturies, que se va poner en marcha nes próximes selmanes. Esta oficina, incluyida ente les midíes del Plan Retornes pa favorecer el regresu de población asturiana emigrante, va actuar como un ventanu únicu que va facilitar asesoría social, llaboral, económica y alministrativa a quien retornaren a Asturies o deseyen faelo. Tamién va ufiertar siguimientu, tanto de forma presencial como telemática, pa sofitar la integración social y llaboral de quien hayan vueltu, especialmente, d’aquelles persones en situación d’especial vulnerabilidá.
La Dirección Xeneral d’Emigración y Polítiques de Torna habilitó’l corréu electrónicu oficinadelretorno@asturias.org pa enriar tola demanda d’información y los trámites relativos al regresu a Asturies.
Romano participó ayeri xuntu cola presidenta del Conseyu de Comunidaes Asturianes, María Antonia Fernández Felgueroso, nel actu d’entrega de medayes a los socios del Centru Asturianu de Buenos Aires que cumplen 25, 50 y 75 años d’antigüedá. “Asturies ye una tierra d’oportunidaes y queremos averales tolo posible a quien permanecen nel esterior y tienen interés en retornar a la so tierra d’orixe, en volver pa quedase. Estos puntos de sofitu nel esterior suponen un pasu más nel impulsu qu’esti gobiernu ta dando a les polítiques de retornu”, destacó mientres l’actu.
