L’asamblea d’IX afita’l ‘sí’ a la investidura d’Ana González

La propuesta salió alantre por unanimidá

0
111
L'asamblea d'Izquierda Xunida (IX) afita'l 'sí' a la investidura d'Ana González
Aurelio Martín, mientres una intervención n'asamblea d'esti xueves

L’asamblea d’Izquierda Xunida (IX) afitó na tarde del xueves el sí de la coalición a la investidura d’Ana González. El conceyu, que cuntó cola presencia de 97 persones acreditaes, sofitó por unanimidá la propuesta. D’esta manera, Aurelio Martín, l’únicu conceyal col que va cuntar la formación na Casa Conceyu, va apoyar la candidatura de la socialista Ana González a la investidura.

La sintonía ye plena ente dambes fuercies. Esta selmana, PSOE ya IX ficieron públicu un manifiestu conxuntu nel qu’amosaben el so compromisu de trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista.

La candidata socialista nun va algamar, salvo sorpresa d’última hora, la mayoría absoluta nel Plenu d’investidura. El sí afitáu pola asamblea d’IX nun-y da a Ana González los votos suficientes pa salir escoyida en primer votación. La socialista nun va cuntar col sofitu de les tres conceyales de Podemos-Equo. La coalición anunció esta selmana la so decisión d’astense. La candidatura lliderada por Yolanda Huergo plantegó al PSOE un decálogu de midíes sobre les que trabayar, pero «los socialistes respondieron postponiendo les conversaciones».