Podemos va astenese na investidura d’Ana González

Les conceyales de la formación morada llamenten la "falta de concreción" del PSOE énte les sos propuestes

0
126
Podemos va astenese na investidura d'Ana González
Podemos-Equo Xixón anuncia la so astención nel Plenu de Investidura. / Podemos

Les tres conceyales de Podemos-Equo nun van sofitar la candidatura Ana González nel Plenu d’investidura d’esti sábadu. La coalición anunció esta decisión nuna nota de prensa na que confirma l’astención del so grupu. La candidatura asegura que plantegó al PSOE un decálogu de midíes sobre les que trabayar pa llograr los síes de la candidatura morada y verde, pero «los socialistes respondieron postponiendo les conversaciones a la primer selmana de xunetu».

Yolanda Huergo, vocera de la coalición, asegura que «gustáranos que la respuesta concretara los asuntos nos que tamos y nun tamos acordies con más detalle». Según afirma, l’oxetivu de la candidatura que representa yera llegar al Plenu con «posibilidá real» de trabayar sobre les sos midíes enantes del Plenu. Huergo amosóse crítica cola postura de la candidata socialista. Ana González nun necesita los votos de les conceyales de Podemos-Equo na sesión d’investidura. La vocera llamentó’l «desinterés del PSOE por una verdadera mayoría progresista na ciudá». Y manifestó que, a partir del llunes, «Podemos-Equo va dedicar tola so enerxía a trabayar poles polítiques que precisen tolos vecinos de Xixón».

Ana González nun necesita sofitos pa ser alcaldesa. La candidata socialista va poder ser investida alcaldesa al ser la candidatura más votada y nun haber mayoría alternativa. La falta de sintonía con Podemos enantes del Plenu d’investidura contrata cola bona rellación con IX. El candidatu de la coalición, Aurelio Martín, sí va dar el sí a la candidatura d’Ana González y nun se descarta un gobiernu de coalición ente dambes formaciones.