PSOE ya IX van alcordar un programa de gobiernu conxuntu

Dambes fuerces polítiques alcuerden una declaración política “pol futuru de Xixón”

0
156
PSOE ya IX van alcordar un programa de gobiernu conxuntu a partir del sábadu. / PSOE
PSOE ya IX van alcordar un programa de gobiernu conxuntu a partir del sábadu. / PSOE

Izquierda Xunida (IX) va votar a favor de la investidura de la candidata del PSOE. Dambes formaciones van trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista. «Hai muchos proyectos qu’impulsar tres los ocho años de paralises de Foru».

González insitió en que les midíes que se van acometer tendrán de ser frutu d’un alderique sele y fondo, pero sobremanera, d’un trabayu responsable que va empezar el sábadu. Sicasí señaló que l’equipu de gobiernu va trabayar «dende la izquierda» siendo «conscientes de qu’hai cuestiones que van riquir d’un ampliu consensu«. Fizo referencia al plan de víes, proyectu sobre’l qu’aseguró que «intentaráse sumar a tolos grupos políticos».

Ana González destaca que l’equipu de gobiernu va trabayar «dende la izquierda»

Respectu al decálogu presentáu por Podemos-Equo y a la posibilidá d’aceptalo de cara a cuntar col votu de los moraos nel plenu del sábadu, González reconoció que prefier dexar les coses fluyir. «Nun ye necesariu un trabayu pocu fondu y pocu seriu col únicu oxetivu de paecer que cuentu con más sofitos de los que tengo», dixo. Nesti sentíu reivindicó la necesidá d’empezar un trabayu de fondura que defina claramente’l presente, pal futuru de Xixón. «El presente nun ye’l 15, empieza’l 16», señaló.

Ana González emplazó a Podemos a aconceyar na primer selmana de xunetu. Esta posición  llevó a les tres conceyales de la formación morada a tomar la decisión d’astenese nel Plenu d’investidura. Yolanda Huergo, vocera de la coalición, aseguró que «gustáranos concretar los asuntos nos que tamos d’alcuerdu» enantes de la votación.