La Conseyería de Mediu Rural y Cohesión Territorial abonó güei dos millones n’ayudes directes de la Política Agraria Común (PAC) a 1.397 ganaderíes de vacunu de lleche. D’esta miente, Asturies asítiase ente les primeres comunidaes n’empecipiar el pagu de les sovenciones del periodu ordinariu de la PAC, un sofitu fundamental pa dotar de lliquidez al sector ganaderu asturianu.
Esta cuantía súmase a los 6,1 millones del anticipu abonaos el 15 de payares a 1.353 esplotaciones llecheres. Amás, mientres esti mes van realizase nuevos pagos de les ayudes directes de les que yá s’efectuaron anticipos en payares (pagu básicu, pagu verde, adicional al sector lácteo y vaques nodrizas), del complementu pa mozos y les sovenciones de desenvolvimientu rural (monte, rede Natura 2000, producción ecolóxica, races autóctones, apicultura y pumar pa la biodiversidá).
El Boletín Oficial del Principáu (Bopa) publica güei los resolvimientos de concesión del anticipu del 70% de les ayudes de pagu básicu, pagu verde y adicional a les vaques nodrices que s’ingresaron en payares.
Los fondos de la PAC resulten imprescindibles p’avanzar na profesionalización y rentabilidá de les esplotaciones familiares agraries. Por esta razón, el proyectu de presupuestos de la conseyería pa 2023 amonta les ayudes directes, que van superar los 100 millones. Tamién se crea una llinia estraordinaria, dotada con cuatro millones, pa desaniciar la medría de costos que sufre anguaño la ganadería.
