El Gobiernu d’Asturies va adelantar a les 22:00 hores el toque de queda, vixente agora dende les 23:00 hores, a partir del próximu xueves, día 14 de xineru. D’esta miente, la movilidá va tar llindada n’Asturies ente les 22:00 y les 06:00 hores. Nesta franxa nocherniega van permitise namás les salíes pa mercar melecines, productos sanitarios y otros bienes de primer necesidá; p’asistir a centros médicos y veterinarios, p’allegar o tornar del trabayu, pal cuidu de persones mayores, dependientes, con discapacidá o especialmente vulnerables y pa cualesquier otra actividá debidamente acreditada.
El Boletín Oficial del Principáu (BOPA) espublizó yá un decretu del presidente, Adrián Barbón, pol que s’establez esta midida y ordena tamién el zarru perimetral del conceyu de Grau, dende la medianueche d’ayeri y hasta’l día 25 de xineru, col envía d’ameyorar el control del biltu de coronavirus detectáu nel conceyu. Esta iniciativa pretende llindar los desplazamientos –y, con ello, los contactos sociales y la confluencia de persones- pa frenar la cadena del andanciu.
El decretu acuta la entrada y salida de persones del ámbitu territorial de Grau sacantes pa desplazamientos debidamente xustificaos que respuendan a l’asistencia a centros, servicios y establecimientos sanitarios, el cumplimientu d’obligaciones llaborales, profesionales, empresariales, institucionales o llegale, l’asistencia a centros universitarios, docentes y educativos, incluyíes les escueles d’educación infantil, la torna al llugar de residencia habitual o familiar, l’aistencia y curiáu a mayores, menores, dependientes, persones con discapacidá o persones especialmente vulnerables, el desplazamientu a entidaes financieres y de seguros o estaciones de repostaxe en territorios estremeros, actuaciones urxentes énte órganos públicos, xudiciales o notariales, renovaciones de permisos y documentación oficial, según otros trámites alministrativos inaplazables, realización d’esámenes o pruebes oficiales inaplazables, causes de fuerza mayor o situación de necesidá o cualesquier otra actividá d’análoga naturaleza, debidamente acreditada.
Tamién van ser razones xustificaes pa la entrada o salida del conceyu la realizaciín d’entrenamientos y competiciones d’actividá deportiva federada, los actos de collecha en güertos per parte de los sos propietarios o renteros, amás de l’atención y alimentación d’animales domésticos, la merca d’alimentos o productos de primer necesidá per parte de persones con residencia habitual en llocalidaes que, siendo d’otru conceyu, escarezan d’establecimientos pa l’adquisición de talos productos y seyan estremeros con Grau. Estes trés últimes causes van habilitar pal desplazamientu mientres el tiempu indispensable pa realizar l’actividá, una única vegada al día, y en nengún casu van poder desenvolvese mientres el períodu de restricción nocherniegu de la movildá.
Per otra parte, el BOPA tamién espublizó ayeri un resolvimientu de la Conseyería de Salú qu’actualiza les midíes estraordinaries pa la prevención, contención y coordinación énte la pandemia de la covid-19 anguaño a valir.
