El Gobiernu del Principáu algamó un alcuerdu con Correos pa que la empresa empiece a utilizar la toponimia oficial asturiana en tolos sos unvios. Les cartes, paquetes y notificaciones que s’unvien dende les 2.389 oficines postales del país van usase nes direcciones la nomenclatura tradicional, tal que solicitara formalmente l’Executivu autonómicu.
La conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García, axuntáronse güei en Madrid cola directora de Relaciones Institucionales de Correos, Leire Díez Castro, quien ratificó’l compromisu de la compañía pa usar la toponomia del Principáu y confirmó, amás, que la empresa yá empezó a trabayar nesti cambéu, que se preve pueda rematar nel primer trimestre de 2023.
Piñán estimó la sensibilidá y receptividá amosada por Correos pa utilizar la toponimia oficial, aprobada yá en 74 de los 78 conceyos asturianos. La conseyera recordó que se trata d’acciones amparaes pola Llei 1/1998, de 23 de marzu, d’Usu y Promoción del Bable/Asturianu, y destacó la importancia de que les alministraciones públiques s’impliquen nel so cumplimientu.
Pa que les notificaciones de Correos referíes a poblaciones asturianes recueyan la nueva toponimia, ye necesariu que l’Institutu Nacional d’Estadística (INE), que representa la información oficial del Estáu y encárgase d’esportar les nomenclatures a España, realice los cambeos necesarios nel so Nomenclator, con cuenta de que los sistemes de Correos puedan incluyiles.
Na xunta celebrada esta mañana, Leire Díez espresó’l compromisu de Correos con Asturies, tantu col espardimientu de la so cultura y tradiciones, como cola garantía nel accesu a los servicios básicos a tolos sos habitantes, ensin importar ónde moren. Para garantizalos, la empresa facilita servicios, al traviés de les oficines postales y de los 310 carteros rurales del Principáu, como la unviada de dineru n’efectivu al traviés de Correos Cash, y trámites como’l pagu de tributos y recibos o de xestiones colos servicios de suministros básicos.
