L’aeropuertu d’Asturies sigue ampliando la so ufierta de vuelos directos. Esta primavera, van algamase los 13 destinos internacionales y un total de 29 conexones. A los ocho destinos internacionales qu’operaron na temporada d’iviernu (Ámsterdam, Bruxeles, Düsseldorf, Roma, Dublín, Londres Stansted, Londres Gatwick y París) van sumase Milán y Lisboa, esta selmana; Frankfurt y Múnich, n’abril, y Venecia en mayu, lo que va dexar consolidar la mayor ufierta aérea de la hestoria del aeropuertu.
El presidente d’Asturies, Adrián Barbón, acompañáu pol conseyeru de Mediu Rural y Cohesión Territorial, Alejandro Calvo, y el viceconseyeru d’Infraestructures, Movilidá y Territoriu, Jorge García, dio esta mañana la bienvenida a los primeros viaxeros procedentes de Milán. Dende güei, Asturies dispón de trés frecuencies selmanales (martes, xueves y domingos) col aeropuertu de Milán-Bérgamo (BGY), y dende’l domingu tamién va cuntar con frecuencies selmanales con Lisboa (miércoles, vienres y domingu). La compañía Volotea opera dambes conexones.
A estos dos nuevos destinos sumaránse’l próximu mes les conexones coles ciudaes alemanes de Frankfurt (23 d’abril) y Múnich (29 d’abril), dambes operaes por Lufthansa y que van cuntar con trés y una frecuencies selmanales, respectivamente. Amás, la compañía Volotea, única aerollinia qu’allegó a la llicitación pa la promoción d’Asturies al traviés de la so conectividad aérea col Vénetu y Granada, punxo güei a la vienta los vuelos que van conectar a partir del próximu 25 de mayu Asturies con Venecia (llunes y xueves) y con Granada (miércoles y sábados) dende’l 27 de mayu.
A la ufierta nacional, va añedise esti xueves la conexón col aeropuertu de Barcelona. Volotea va ufiertar una frecuencia diaria col aeropuertu d’El Prat a primer hora de la mañana (07:30 hores), sacante los vienres y domingos, cuando l’avión va partir a les 16:00 hores. Esti serviciu compleméntase coles 19 frecuencies selmanales con Barcelona que yá ufierta Vueling, lo que favorez los viaxes d’ida y vuelta nel día y ameyora les tarifes disponibles pa los usuarios.
En total, Asturies va cuntar con 29 destinos directos operaos por siete compañíes, de los que 13 son internacionales (Ámsterdam, Bruxeles, Dublín, Düsseldorf, Frankfurt, Lisboa, Londres Gatwick, Londres Stansted, Milán, Múnich, París, Roma y Venecia) y 16 nacionales (Alicante, Barcelona, Fuerteventura, Granada, Gran Canaria, Eivissa, Lanzarote, Madrid, Málaga, Mallorca, Murcia, Menorca, Sevilla, Tenerife Norte, Tenerife Sur y Valencia). Estes conexones materializáronse gracies al impulsu que’l Gobiernu d’Asturies dio al programa de promoción aérea internacional, según a les xestiones realizaes pola Conseyería de Mediu Rural y Cohesión Territorial coles distintes aerollinies.
