Talleres d’escritura, esposiciones, actividaes infantiles y recitales son solo dalgunes de les opciones incluyíes esta selmana na programación de los equipamientos culturales del Principáu pa conmemorar el Día del Llibru, que se celebra’l domingu 23. El programa ta formáu por más d’una trentena d’actividaes previstes per tola comunidá y destinaes a tolos públicos.
Asina, la Biblioteca d’Asturies Ramón Pérez de Ayala va inaugurar la esposición Clarín, un cuentista fantásticu, una retrospectiva que pon el focu nuna de les coses más desconocíes de la obra de Leopoldo Alas: los sos títulos venceyaos al xéneru fantásticu y oníricu. Trátase d’un xéneru casi escepcional ente los autores españoles del Realismu, pero que Clarín sí esplora en dellos de los sos cuentos.
L’amuesa va poder visitase, de manera gratuita, a partir del vienres, 21 d’abril. Amás, el domingu 23 los más pequenos van poder esfrutar del espectáculu de maxa Érase una vegada… una ilusión.
Nel casu de la Biblioteca Xovellanos de Xixón, y tamién a partir del vienres, va tar abierta al públicu la esposición La revista Clarín y la nueva lliteratura, que percuerre la trayectoria de la prestixosa publicación lliteraria dende la so creación en 1996 y a lo llargo de les sos más 160 númberos publicaos. Clarín convirtióse nun referente ente les cabeceres nacionales dedicaes a la crítica lliteraria y la nueva lliteratura.
Dientro del circuitu lliterariu del programa Asturies, Cultura en Rede van desenvolvese 15 actividaes en 14 conceyos. Talleres d’escritura, d’impresión o d’ilustración formen parte de la ufierta, xunto con charres y distintes esperiencies lliteraries creatives.
Pela so parte, la Orquesta Sinfónica del Principáu d’Asturies (OSPA) festexa’l Día del Llibru col OSPA Fest. Books Folixa Music, que va ufiertar n’Uviéu y Xixón un programa de conciertos y recitales que proponen la fusión ente música y lliteratura. Asina, el próximu domingu, Día del Llibru, va ufiertar un conciertu de cámara sol títulu Cervantes in memoriam, nel Muséu de Belles d’Asturies, acompañada pol recital del Cuartetu Quiroga y precedida d’una charra de María Fernández Ferreiro.
El Muséu de Belles Artes d’Asturies tamién se va sumar a les celebraciones collaborando, un añu más, nuna esperiencia de bookcrossing xuntu con otres biblioteques de museos y centros de cultura.
Per otru llau, el Centru d’Interpretación del Prerrománicu va acoyer el sábadu 22 el taller de caligrafía Manejo de instrumentos y alfabeto básico: minúsculas, mientres que nel Parque de la Prehistoria de Teberga neños y neñes van esfrutar el día 23 de Palabres de Prehistoria, un cuentacuentos que-yos llevará miles d’años tras.
