El Gobiernu d’Asturies llanza per primer vegada un programa de beques pa les persones que se presenten a procesos selectivos de l’Alministración autonómica. La convocatoria, por valor de 210.000 euros, va sovencionar gastos como l’asistencia a centros especializaos, honorarios de formadores, material d’estudiu y alquiler de vivienda.
Esti programa tien como oxetivu sofitar a les persones aspirantes mientres la preparación d’estos procesos y busca facilitar la captación de talentu y l’igualdá d’oportunidaes nel accesu al empléu públicu.
El Boletín Oficial del Principáu (Bopa) publica güei les bases d’estes ayudes, que se van abonar a lo llargo del añu. La cuantía y los criterios específicos pa solicitales van detallase na convocatoria, que se va llanzar en próximes selmanes.
El procesu de valoración va tener en cuenta distintes aspectos, dende’l nivel de renta familiar hasta determinaes circunstancies personales, familiares y sociales. Les persones beneficiaries tendrán de rematar el procesu selectivu y presentar la documentación que la demuestre. La xustificación va incluyir una memoria d’actuación, una relación detallada de gastos y los correspondientes xustificantes.
Los procesos selectivos sovencionables van concretase na convocatoria, pero dará prioridá a la preparación d’aquellos qu’impliquen mayor temariu, más tiempu d’estudiu y más gastos en preparadores y academies, que se correspuenden colos puestos de mayor responsabilidá na Alministración: titulaos cimeros y titulaos medios universitarios.
