El gobiernu d’Asturies creó’l distintivu Artesanía d’Asturies, una marca institucional que tien como oxetivu dotar d’imaxe propia, única y reconocible a los productos realizaos polos artesanos de la comunidá. La Dirección Xeneral d’Empresa y Comerciu aprobó la regulación d’esti sellu, qu’empezó a recibir solicitúes d’usu per parte d’empreses, talleres y profesionales del sector, inscritos nel Rexistru d’Actividaes Artesanes.
Con esta iniciativa pretende dase visibilidá, protexer y caltener el prestíu de los artesanos asturianos y de les sos obres, teniendo en cuenta la variedá d’oficios y, por tanto, de los productos d’esti tipu esistentes n’Asturies. Sicasí, la presencia del asturianu ye inesistente y nel manual de marca nun apaez. Mesma situación pal eonaviego, que nun apaez per nenguna parte, magar que dambos idiomes formen parte esencial de la cultura d’Asturies y de la so artesanía.
El desenvolvimientu de la marca impúlsase tres l’alquisición, el pasáu mes de xineru, de la propiedá del distintivu Artesanía d’Asturies per parte del gobiernu. El nuevu sellu ta formáu por un isotipu inspiráu nun trisquel celta, símbolu d’identidá asturiana, y formáu por dos lletres A n’azul y mariellu acompañaes del logotipu Artesanía d’Asturies.
Esta acreditación institucional busca destacar y roblar productos fechos n’Asturies; destacar la so procedencia; favorecer el so espardimientu y comercialización frente a los consumidores; protexer el prestíu de los talleres y artesanos asturianos, mesmo que de les sos creaciones, ya informar claramente sobre la naturaleza artesanal de los productos a los consumidores que los merquen.
El decretu que regula esti distintivu, publicáu pola Conseyería de Ciencia, Industria y Comerciu nel Boletín del Principáu (BOPA), establez el so usu pa empreses y talleres artesanos inscritos nel Rexistru d’Artesanía del Principáu d’Asturies, asina como asociaciones profesionales del sector, puramente n’actividaes de promoción o comercialización de productos realizaos por asociaos que tean daos d’alta nel mentáu rexistru.
La Dirección Xeneral de Comerciu yá empezó a tramitar les primeres solicitúes, que tienen de presentase al traviés de la see electrónica del Principáu d’Asturies. El procedimientu va caltenese abiertu de manera permanente y el plazu pa conceder autorización pal usu del distintivu ye d’un máximu de trés meses.
