El conseyeru de Movilidá, Mediu Ambiente y Xestión d’Emerxencies, Alejandro Calvo, desactivó’l Plan Territorial de Protección Civil d’Asturies (Platerpa) a les 09.39 hores de güei, que se caltenía activáu dende les 13:54 hores del llunes, cuando se produció un apagón xeneralizáu del suministru llétricu qu’afectó a la mayor parte del país.
Esta decisión adoptóse tres la xunta celebrada pol comité asesor del plan esta mañana, na que se valoró la situación actual y concluyó que los servicios esenciales siguieron totalmente garantizaos y ensin incidencies derivaes de la situación del apagón llétricu. El comité consideró qu’Asturies ta en “una situación de vuelta a la normalidá, polo que propunximos la desactivación del plan d’emerxencies”, esplicó’l conseyeru.
Calvo valoró “el comportamientu de la sociedá asturiana y el nivel de civismu que dexó que superar esta situación fuera muncho más cenciello”. Destacó, amás, “la coordinación de tolos intervinientes” y agradecíu a los profesionales, tantu d’emerxencies, como a la sala del 112, al SAMU, Protección Civil y los sos voluntarios, Cruz Roja, Policía Municipal, Bomberos del Sepa, axentes de Mediu Natural, agrupaciones de tráficu, Bomberos d’Uviéu y Xixón, refuerzos de la Guardia Civil, Policía Nacional, Guardia Civil de Tráficu, l’Asociación de Radioaficionaos d’Asturies, la Brigada d’Infantería de Cabu Noval, amás d’a la Universidá d’Uviéu l’asociación profesional Otea y l’Unidá Militar d’Emerxencies
El Serviciu d’Emerxencies (Sepa) atendió 2.657 llamaes y 738 incidentes dende les 12:30 hores del llunes y hasta los nueve de la mañana d’ayeri. A les 7:00 hores d’ayeri, yá se restableciera n’Asturies el 99% del suministru.
