El conseyeru de Fomentu, Cooperación Local y Prevención de Quemes, Alejandro Calvo, anunció na Xunta Xeneral l’esplegue d’una estratexa de xestión integral pa encarar les quemes forestales. Acordies colos principios de custodia del territoriu, el Gobiernu d’Asturies va poner en marcha cambeos llegales, va reforzar los medios humanos y materiales, va aumentar la llimpieza de montes –n’especial, nes cercaníes a les zones habitaes- y va aumentar la collaboración los conceyos.
Les principales llínees de trabayu van ser les siguientes:
Reorganización y refuerzu de les Brigaes d’Investigación de Quemes forestales. Acordies colos encamientos de la Fiscalía de Mediu Ambiente, Calvo avanzó que se va revisar la lexislación actual pa que les brigaes puedan actuar como policía xudicial y en rellación col serviciu d’axentes medioambientales. Tamién se va reforzar la vixilancia preventiva, según los recursos y medios disponibles.
Revisión de la Llei de Montes. En collaboración cola Conseyería de Mediu Rural, Fomentu prepara un cambéu de la llei de Montes. El cambéu llegal va dexar cuntar con preseos normativos más efectivos de prevención, ameyorar la seguridá de los pueblos, xestionar la interfaz urbanu-forestal (l’espaciu fronterizu ente los pueblos y los montes) y desenvolver infraestructures de protección.
Nueva estratexa de prevención. La collaboración ente les dos conseyeríes va estender al desenvolvimientu de nueves estratexes de prevención de quemes, tanto al traviés de l’ampliación del fondu de prevención municipal, dotáu con 4,5 millones, como por aciu un programa específicu d’inversiones. Tratar de midíes que dexen llevar a cabo trabayu de silvicultura, roces y caltenimientu d’infraestructures, acciones qu’ameyoren la seguridá de los pueblos y allíniense cola adaptación de los montes al cambéu climáticu.
Creación d’una rede de puntos de xestión estratéxica énte grandes fueos. Esta rede va dexar fortalecer la capacidá de respuesta énte estos riesgos, la protección de los pueblos y la preservación d’espacios naturales protexíos.
Aumentu de los recursos del Serviciu d’Emerxencies (Sepa), tanto en númberu de persones como n’inversiones destinaes a garantizar una respuesta más efectiva: meyora de los medios aéreos, renovación de la rede de comunicación, más vehículos d’emerxencia y equipos de respiración autónoma, etcétera. Tamién se va actuar na meyora y adecuación de los parques de bomberos.
Collaboración colos conceyos. La conseyería va establecer un plan de desbroces y quemes controlaes, acordies coles entidaes locales. Nesta iniciativa van involucrase a les empreses de sofitu a la estinción de quemes qu’empresten serviciu pal Sepa, coles mires d’aprovechar la so especialización y presencia nel territoriu.
