La Conseyería de Derechos Sociales y Bienestar, al traviés de l’Axencia Asturiana de Cooperación al Desenvolvimientu, va destinar 118.900 euros p’ayudes d’emerxencia humanitaria al pueblu palestín na Franxa de Gaza. La subvención, autorizada ayeri pol Conseyu de Gobiernu, va canalizase al traviés de l’axencia de la ONU pa persones abellugaes de Palestina n’Oriente Próximu (UNRWA, poles sos sigles n’inglés).
La intervención enmárcase nel llamamientu d’emerxencia de la UNRWA y tien como oxetivu cubrir les necesidaes alimentarias más acucioses de la población afectada pol aumentu de violencia en Gaza y polos bombardeos del exércitu israelín.
L’axencia internacional va distribuyir un total de 3.868 raciones o cestes d’alimentos a otres tantes persones a lo llargo de doce meses, de les cualos 1.973 van apurrise a muyeres. La cesta d’alimentos inclúi 25 quilos de farina de trigu, 2 quilos d’arroz, 1 quilu de garbanzos, 1 llitru d’aceite, y 0,5 quilos de llenteyes, lleche en polvu y zucre, anque por cuenta de la situación d’emerxencia, los alimentos y cantidaes pueden variar p’afaese a les necesidaes y la disponibilidá.
Pol calter especial de l’ayuda, UNRWA va priorizar a la población más vulnerable, esto ye, persones que viven en refuxos de l’axencia de la ONU, que perdieron el so llar o que nun cunten con medios pa poder aprovise d’alimentos. Amás, los alimentos van llegar a persones en situación d’especial protección como muyer cabeza de familia, persones con discapacidá o víctimes de violencia de xéneru, ente otres.
