La Conseyería de Presidencia, Retu Demográficu, Igualdá y Turismu abrió la convocatoria d’ayudes pa muyeres víctimes de violencia de xéneru y a fíos y fíes de víctimes mortales, dotada con 1.088.000 euros y creitu ampliable pa cubrir tola demanda.
L’oxetivu d’esta llinia ye apurrir sofitu económicu a les muyeres afectaes por esta grave lacra social, col fin de facilitar la so recuperación. Tamién busca ufiertar respaldu a los fíos y fíes de les víctimes asesinaes poles sos pareyes o expareyes.
El plazu de presentación de solicitúes va abrise mañana, martes 20 d’agostu, y va rematar el 1 d’ochobre de 2024. Les persones interesaes pueden aportar a tola información, mesmo que realizar la solicitú de manera electrónica, al traviés de la see electrónica.
La convocatoria estrémase en dos llinies:
Llinia 1: fíes y fíos de víctimes mortales por violencia de xéneru: 30.000 euros. Van poder optar a estes ayudes, hasta los 18 años d’edá, inclusive, güérfanos de muyeres asturianes o empadronaes n’Asturies nel momentu del asesinatu, mesmo que mozos d’hasta 26 años que cursen estudios reglaos y cumplan los requisitos establecíos. Cada persona beneficiaria va recibir 3.000 euros.
Llinia 2: víctimes de violencia machista: 1.058.000 euros. Empobinaes a muyeres víctimes de violencia de xéneru, mayores d’edá o legalmente desafiaes, empadronaes y con residencia n’Asturies y en situación de vulnerabilidá económica. Les solicitantes tienen de cuntar con un informe favorable d’un centru asesor de la muyer que respuenda pola necesidá de l’ayuda nel so procesu de recuperación y acreditar que nun conviven col agresor. Cada perceptora va recibir una ayuda añal de 3.000 euros.
Esta convocatoria abrióse primeramente en 2019 con una dotación de 300.000 euros, una partida que se foi amontando hasta superar el millón anguaño.
