Asturies yá cunta col primer Manual de llinguaxe alministrativu en llingua asturiana pa facilitar l’usu del asturianu na Alministración pública. La ellaboración débese a un grupu de trabayu impulsáu dende la Conseyería de Cultura, Política Llingüística y Deporte y dende l’Institutu Asturianu d’Alministración Pública (IAAP) del Principáu d’Asturies. Nesi grupu de trabayu participaron otres entidaes de l’alministración, la Universidá d’Uviéu, l’Academia de la Llingua Asturiana y la Rede de Normalización Llingüística.
Esti testu de referencia parte de trabayos anteriores, ellaboraos por socesivos departamentos encargaos de la promoción del asturianu na Alministración autonómica, pero ye la primera iniciativa puesta en marcha nel Principáu pa dotar d’una ferramienta de normalización léxica y llingüística a les Alministraciones autonómica y llocal, a disposición de les persones que nelles trabayen.
El grupu de trabayu afitó les tipoloxíes documentales que más usa l’Alministración pa depués ellaborar modelos n’asturianu d’esos documentos. El manual incorpora tanto documentos de l’Alministración autonómica (formularios, requerimientos, resoluciones, declaraciones responsables, anuncies, bases reguladores…), como de la local (certificaciones, solicitúes, fueyes de reclamación, llicencies, actes de matrimoniu…). El manual, que tien un formatu billingüe n’asturianu y castellanu, complétase con dellos anexos: abreviatures, llista de normativa y un glosariu de terminoloxía alministrativa.
Esti documentu, colos distintos formularios, va tar accesible y descargable a partir d’esti miércoles día 21 de febreru, coincidiendo col Día de la Llingua Materna. Y, progresivamente, van dir implementándose nos sistemes informáticos de l’Alministración.
