Los llabores, encargaos por Mediu Rural y Cohesión Territorial, van allargase dellos meses a tenor de la meteoroloxía.
La Conseyería de Mediu Rural y Cohesión Territorial empezó esta selmana los trabayos que dexen cada añu llimpiar y rozar los 4.254 quilómetros de carreteres de la rede autonómica. Los llabores van durar trés o cuatro meses a tenor de la meteoroloxía.
L’actuación consiste en cortar y retirar la broza que medra nes veres de les víes del Principáu cola cuenta d’ameyorar la seguranza y comodidá de la circulación de parte branu, na que’l tránsitu de vehículos aumenta considerablemente polos movimientos camín de les playes y los desplazamientos turísticos en xeneral.
Pa entainar cola realización d’estos trabayos, el Gobiernu d’Asturies convirtió l’añu pasáu’l contratu, tradicionalmente anual, n’otru con una duración de dos años, prorrogable otros dos. Esti cambéu enmárcase nun apueste del Executivu por reforzar les polítiques de caltenimientu de les infraestructures asturianes con un aumentu de les partíes presupuestaries destinaes a esi fin.
La campaña braniega de roza faise con sofitu esternu. En concreto, formalizáronse diez contratos p’actuar sobre más de 2.814 quilómetros de 229 carreteres. Estos trabayos completen les xeres que desenvuelven tol añu les brigaes de la Dirección Xeneral d’Infraestructures Viaries y Portuaries pa caltener los más de cuatro mil quilómetros de les 472 calzaes qu’integren la rede viaria autonómica.
