Asturies estrena la temporada de branu del aeropuertu cola mayor ufierta de la hestoria: 30 destinos directos, que van suponer una ufierta global de 1.460.000 places en rutes regulares. La Estratexa de Conectividad Aérea que punxo en marcha’l Gobiernu del Principáu en 2019 llogró que la terminal de Santiago del Monte s’asitie como la octava del país con mayor ufierta de destinos nacionales (19) y la segunda de la España Verde, solo per detrás de Bilbao. Per delantre del aeropuertu d’Asturies en númberu de rutes interiores asítiense Mallorca (32), Barcelona (30), Madrid (29), Málaga (22), Valencia (22), Sevilla (20) y Bilbao (20).
Dende’l 30 de marzu al 25 d’ochobre, tán previstos 8.686 vuelos regulares: 2.006 a destinos internacionales y 6.680 a aeropuertos españoles. Anguaño incorpórense al catálogu de rutes directes les de Xerez, Castellón y Melilla, coles que se algamaron 19 destinos nacionales. Asina, nos próximos meses podrá volar ensin escales dende Santiago del Monte a Madrid, Barcelona, Sevilla, Valencia, Alicante, Castellón, Palma de Mallorca, Menorca, Eivissa, Xerez, Granada, Málaga, Gran Canaria, Tenerife Sur, Tenerife Norte, Fuerteventura, Lanzarote, Melilla y Murcia.
Per primer vegada, Asturies va tar conectada simultáneamente con cuatro ciudaes andaluces: Sevilla, Málaga, Xerez y Granada. Les conexones con Andalucía, operaes por Volotea, algamen les 537 frecuencies d’ida y vuelta y 170.000 places directes ente les dos comunidaes mientres la temporada de branu. Sevilla y Málaga van cuntar con siete frecuencies selmanales y Granada y Xerez, con dos.
Amás, Asturies va tar conectada colos trés aeropuertos de la Comunidad Valenciana, tamién per primer vegada. P’Alicante y Valencia va haber siete frecuencies selmanales y pa Castellón, dos. D’esta miente, van algamase casi 150.000 places nes 465 conexones que Volotea tien programaes hasta finales d’ochobre.
